Ghazal

nahin aao ki ab aavaaz-e-paa se choT lagti hai

mire ehsaas par teri sadaa se choT lagti hai

tujhe khud apni majburi kaa andaaza nahin shaayad

na kar ahd-e-vafaa ahd-e-vafaa se choT lagti hai

· · ·

zikr us raat se hai vaabasta

jo tiri zaat se hai vaabasta

jiit meri faqat miri to nahin

ye tiri maat se hai vaabasta

· · ·

jab muqaddar hi mein hai tanhaai se yaari paagal

phir vahi shakhs hai kyuun zehn pe taari paagal

raat bhar teri tamannaa ke safar mein guzri

duur tak tirgi-e-raah pukaari paagal

· · ·

yaarab diyaa hai husn to ye bhi kamaal de

main hans paDun to phuul bhi khushbu uchhaal de

andaaz meri pyaas kaa jaanegaa koi kyaa

chaahun to ik pahaaD bhi chashma nikaal de

· · ·

main nindon kaa bahaana chaahti huun

tire khvaabon mein aanaa chaahti huun

jise sun kar tu sab kuchh bhuul jaae

ghazal vo gungunaanaa chaahti huun

· · ·

tiri chaahat ki aadi ho gai huun

hatheli tu main mehndi ho gai huun

kisi ke vaaste taaza ghazal huun

tiri khaatir kahaani ho gai huun

· · ·

ashk ko aankh ki dahliz pe laayaa na karo

dil ke haalaat zamaane ko bataayaa na karo

apni aankhon mein hasin khvaab sajaayaa na karo

pyaar kaa taaj-mahal dil ko banaayaa na karo

· · ·

shauq-e-didaar miraa aur bhi afzaa na karein

mehrbaan saamne aaein zaraa parda na karein

vo to kuchh ho hi gai tum se mohabbat varna

ham vo khud-sar hain ki apni bhi tamannaa na karein

· · ·

kuchh bhi nahin hai kyaa pas-e-divaar dekhnaa

saae ko Dubte hue har baar dekhnaa

aurat huun meri maan ne sikhaayaa ki umr bhar

aaina ban ke aaina-bardaar dekhnaa

· · ·

dil miraa muztar bahut paiham rahaa

zindagi mein jab musalsal gham rahaa

mehrbaan thaa kuchh tasavvur is tarah

hijr mein bhi vasl kaa aalam rahaa

· · ·

hayaat apni sanvaarun khuli kitaab karun

iraada ye hai tujhe saahab-e-nisaab karun

tamaam umr isi aarzu mein guzri hai

tire mizaaj ko parkhun koi khitaab karun

· · ·

sach pe hi saabit-qadam Thahri thi main

aur jhuTi baat par ruThi thi main

der se aamad ki hi sun kar naved

aap ki tasvir se uljhi thi main

· · ·

muddaton se udaas baiThi huun

le ke tasvir-e-yaas baiThi huun

tishnagi kaa gila karun kis se

jab main dariyaa ke paas baiThi

· · ·

sambhaale abr-e-karam tu sambhal bhi sakti hai

ye dil ki shaakh abhi phul-phal bhi sakti hai

bujhaao maghribi aatish ki baDh ke chingaari

ki is se mashriqi tahzib jal bhi sakti hai

· · ·

shahr-e-taarik ko sapnon kaa nagar hone tak

muntazir baiThi huun is shab ki sahar hone tak

hijr mein haalat-e-dil kaise sambhal paaegi

raah-e-dushvaar se yaadon kaa guzar hone tak

· · ·

uTThe kahin se dard-e-jigar tum ko is se kyaa

lete nahin ho meri khabar tum ko is se kyaa

do hi qadam chali thi paDe chhaale paanv mein

gham se hai chuur zauq-e-safar tum ko is se kyaa

· · ·

zindagi ke liye itnaa bhi kyaa hairaan honaa

mujh ko aataa nahin be-vajh pareshaan honaa

maangnaa jo bhi ho maangungi main apne rab se

maang kar bande se aayaa na pashemaan honaa

· · ·