Ghazal

tirgi mein bhi raushni hoti

dil ko haasil agar khushi hoti

ik nazar mujh ko dekh lete to

dard mein kuchh na kuchh kami hoti

· · ·

yaad rakh kar bhi bhuul jaate hain

dil mein jitne khayaal aate hain

kaash dil ko bhi saaf kar lete

roz gangaa mein jo nahaate hain

· · ·

jis ko apnaa naqsh-e-paa miltaa nahin

us ko manzil kaa pata miltaa nahin

ab to bazm-e-naaz mein bhi aap ki

mere dil ko aasraa miltaa nahin

· · ·

jo khushi kaa payaam laai hai

vo hamaari shikasta-paai hai

phir nasheman ki khair ho yaarab

phir chaman mein bahaar aai hai

· · ·

ishq ki dekhiye rudaad-e-vafaa Thahri hai

dil ki aavaaz zamaane ki sadaa Thahri hai

aaj tak aaina-e-dil mein yaqinan mere

har jafaa teri vafaaon ki adaa Thahri hai

· · ·

kisi se tum na kahin barhami ki baat karo

jahaan mein jis se karo dosti ki baat karo

jalaao shamein khulus-o-vafaa ki duniyaa mein

har ek moD pe tum raushni ki baat karo

· · ·

kah rahe hain yahi bigDe hue haalaat ki bas

ab na qaabu mein raheinge mire jazbaat ki bas

koi monis koi gham-khvaar na aaDe aayaa

is qadar aaj hui aankh se barsaat ki bas

· · ·

divaana doraahe pe khaDaa soch rahaa hai

kaabe mein khudaa hai to sanam-khaane mein kyaa hai

saaqi ki nigaahon se jo sarshaar huaa hai

paimaana uThaane ki zarurat use kyaa hai

· · ·

farz jo hai adaa nahin karte

ham pe vo bhi jafaa nahin karte

zindagi ki tarah se rakhte hain

gham ko dil se judaa nahin karte

· · ·