Ghazal

qubul kar ke teraa gham khushi khushi main ne

tire jamaal ko bakhshi hai zindagi main ne

bas ik nigaah-e-tavajjoh pe is tarah khush huun

ki jaise daulat-e-kaunain luuT li main ne

· · ·

khud apne aap se ham be-khabar se guzre hain

khabar kahaan ki tiri rahguzar se guzre hain

nafas nafas hai moattar nazar nazar shaadaab

ki jaise aaj vo khvaab-e-sahar se guzre hain

· · ·

tabassum mein na Dhal jaataa gudaaz gham to kyaa karte

ki ye shoala na ban jaataa agar shabnam to kyaa karte

luTaa dete na apni zindagaani ham to kyaa karte

nigaah-e-lutf kaa hotaa vahi aalam to kyaa karte

· · ·

mujhe rahin-e-gham-e-jaan-navaaz rahne de

davaa-e-dard-e-jigar chaarasaaz rahne de

nihaan abhi miri vahshat kaa raaz rahne de

na chheD qissa-e-zulf-e-daraaz rahne de

· · ·

vo chaal chal ki zamaana bhi saath chalne lage

nigaar-e-zist tiri samt rukh badalne lage

vafur-e-yaas mein muzhda hai kis ke aane kaa

ye aaj kyuun sar-e-mizhgaan charaagh jalne lage

· · ·

har zarra chashm-e-shauq-e-sar-e-rahguzar hai aaj

dil mahv-e-intizaar hai aur kis qadar hai aaj

goyaa vo jalva-gar hain nigaahon ke ru-ba-ru

is darja eatibaar-e-fareb-e-nazar hai aaj

· · ·

khud apne jazb-e-mohabbat ki intihaa huun main

tire jamaal ki tasvir ban gayaa huun main

hadis-e-ishq huun afsaana-e-vafaa huun main

bhulaa sake na jise tum vo maajraa huun main

· · ·

fikr paabandi-e-haalaat se aage na baDhi

zindagi qaid-e-maqaamaat se aage na baDhi

ham samajhte the gham-e-dil kaa mudaavaa hogi

vo nazar pursish-e-haalaat se aage na baDhi

· · ·

tire karam se tiri be-rukhi se kyaa lenaa

mire khulus-e-vafaa ko kisi se kyaa lenaa

sukun-e-qalb na aasaaish-e-hayaat nasib

ye zindagi hai to is zindagi se kyaa lenaa

· · ·