Ghazal

shama-ru jalva-kunaan thaa mujhe maalum na thaa

saaf parde se ayaan thaa mujhe maalum na thaa

gul mein bulbul mein har ik shaakh mein patte mein bhi

jaa-ba-jaa us kaa nishaan thaa mujhe maalum na thaa

· · ·

sharaab pi kar diyaa hai tum ne jo ham ko jaam-e-sharaab aadhaa

azal se likkhaa huaa thaa shaayad ki paaein ham tum savaab aadhaa

gale lagaa kar liyaa thaa bosa hue the raazi visaal par bhi

taDap ne dil ko jagaa diyaa kyon abhi to dekhaa thaa khvaab aadhaa

· · ·

mere hone se pahunch jaaegaa aaraam ke saath

naama-bar mujh ko bhi le chal mire paighaam ke saath

vo jo divaana saa galiyon mein phiraa kartaa hai

yaad karte hain vo mujh ko magar ilzaam ke saath

· · ·

tabibon se nazar ki choT pahchaani nahin jaati

pareshaan hain ki kyon meri pareshaani nahin jaati

kisi surat miri aashufta-saamaani nahin jaati

bayaabaan bas gae aur ghar ki viraani nahin jaati

· · ·

ishq kaa faisla nahin hotaa

muddaaa bhi adaa nahin hotaa

bhuul jaataa huun sab gunaah ke vaqt

jaise meraa khudaa nahin hotaa

· · ·

sharik-e-dard duniyaa mein baDi mushkil se miltaa hai

duaaein jo davaa se dil kaa maaraa dil se miltaa hai

fareb-e-aasmaan ghurbat ki raatein dekhte jaao

ki har taara charaagh-e-sarhad-e-manzil se miltaa hai

· · ·

qarib maut khaDi hai zaraa Thahar jaao

qazaa se aankh laDi hai zaraa Thahar jaao

na jaao tum abhi taaron kaa dil dhaDaktaa hai

tamaam raat paDi hai zaraa Thahar jaao

· · ·

tumhaare hijr mein dam bhar hamein qaraar nahin

vo gham uThaae hain jin kaa koi shumaar nahin

ye sun rahe hain ki tum ne bhulaa diyaa ham ko

magar tumhaari qasam ham ko e'tibaar nahin

· · ·

vo dil nahin rahaa vo tabiat nahin rahi

shaayad ab un ko mujh se mohabbat nahin rahi

ghabraa rahaa huun kyon ye gham-e-naaravaa se ab

kyaa mujh mein gham ke sahne ki taaqat nahin rahi

· · ·

jal rahaa thaa dil charaagh-e-aarzu khaamosh thaa

ham the vaqf-e-hasrat-e-didaar vo ru-posh thaa

mere naalon ne to mahshar aaj hi barpaa kiyaa

husn to roz-e-azal se hashr dar aaghosh thaa

· · ·

zamin ke zarre zarre naala-o-fariyaad karte hain

chale aao dar-o-divaar tum ko yaad karte hain

mazaa aataa hai kuchh un ko hamaaraa dil dukhaane mein

kabhi ham naala karte hain kabhi fariyaad karte hain

· · ·

javon se ayaan teri haqiqat nahin hoti

aaine mein aaine ki surat nahin hoti

kyaa shaad rahe dahr mein baashinda adam kaa

pardes mein ji lagne ki surat nahin hoti

· · ·

chheDiye saaz-e-zindagi naghma-navaaz ho na ho

aah to kar ke dekhiye soz mein saaz ho na ho

dekhiye qaabil-e-qubull apni namaaz ho na ho

sajda to kar jabin-e-shauq dar-gah-e-naaz ho na ho

· · ·

na manzil na raah-e-adam dekhte hain

magar jaane vaalon ko ham dekhte hain

ajab naaz se haath siine pe rakh kar

vo bimaar-e-hijraan kaa dam dekhte hain

· · ·

tumhaari yaad hai main huun ki zindagi hai yahi

maaal-e-gham hai yahi haasil-e-khushi hai yahi

adu pe lutf-o-karam aur mujh pe jaur-o-sitam

bataa de meri vafaaon ki tohfagi hai yahi

· · ·

sukun-o-sabr ki duniyaa mein naam kartaa jaa

jo ho sakaa na kisi se vo kaam kartaa jaa

nigaah pher ke jaa shauq se khudaa-haafiz

kisi gharib kaa qissa tamaam kartaa jaa

· · ·

jaage ho raat mahfil-e-aghyaar mein zarur

aankhon mein ab vo kufr ki zulmat nahin rahi

jab kar diyaa khizaan ne vo rangin chaman tabaah

vo husn ab kahaan vo malaahat nahin rahi

· · ·

e'tibaar-e-nigah-e-yaar ne dam toD diyaa

aaj ik hijr ke bimaar ne dam toD diyaa

ziist ke qaafila-e-saalaar ne dam toD diyaa

raah-e-ulfat mein dil-e-zaar ne dam toD diyaa

· · ·

jab un ki nigaah-e-sitam dekhte hain

to aalam ko jaa-e-alam dekhte hain

ho ik aaina aaine ke muqaabil

vo zulfon ke jab pech-o-kham dekhte hain

· · ·

daaman ki havaa yaad na zulfon ki ghaTaa yaad

ab kuchh bhi nahin soz-e-gham-e-dil ke sivaa yaad

sargarm-e-safar thaa na rahaa kuchh bhi mujhe yaad

naqsh-e-kaf-e-paa yaad na manzil kaa pataa yaad

· · ·