Ghazal

aariz se tire bahaar maqsud

hai khat se ba-naqsha-zaar maqsud

uD uD ke ghubaar-e-aashiq aayaa

kucha mein jo thaa mazaar maqsud

· · ·

dilon par ye naqsh us ne apnaa biThaayaa

ki jo choT par said aayaa biThaayaa

misaal-e-kabutar mire dil ko us ne

bhagaayaa bulaayaa uThaayaa biThaayaa

· · ·

aashiqi mein hai jaan kaa khaTkaa

aur bhi kuchh buraa bhalaa khaTkaa

yaar sayyaad baaghbaan kaa huaa

ye nayaa aur ik bandhaa khaTkaa

· · ·

vo mizha maarti kaTaari hai

chashm-e-baddur zakhm kaari hai

aankhein chamkaa gayaa vo barq-aasaa

dil miraa vaqf-e-be-qaraari hai

· · ·

ishq hai us zulf kaa sartaaj aaj

hai rasul-e-husn ki mearaaj aaj

nok-e-mizhgaan par nahin hai lakht-e-dil

daar par khinchaa gayaa hallaaj aaj

· · ·

shoaraa mein na ho kyuun sher hamaaraa unchaa

ki qad-e-yaar kaa mazmun hai baandhaa unchaa

naaz ki nashv-o-numaa hai ki hai joban kaa ubhaar

varna kyaa hai tire siine pe ye unchaa unchaa

· · ·

hai hai koi dil dene ke qaabil nahin miltaa

armaan taDapte hain ki qaatil nahin miltaa

ho aql to ho til ki jagah aankh mein laili

jhak qais ki hai saahib-e-mahmil nahin miltaa

· · ·

chashm-e-khunbaar mein kyuun lakht-e-jigar jamaa karein

ghuncha-e-gul ki tarah kaa hai ko zar jamaa karein

qatl ke baad huaa hukm ki laashein uTh jaaein

qaid-e-tafriq se maqtulon ke sar jamaa karein

· · ·

husn-e-surat mein garche buud nahin

par kahaan ishq ki numud nahin

nisti jalva-gar hai hasti mein

kuchh adam kaa mire vajud nahin

· · ·

vo but bol uTThe kisi baat mein

khudaa se ye maangaa munaajaat mein

Tapaktaa bahut khaana-e-chashm hai

makaan baiTh jaataa hai barsaat mein

· · ·

chor darvaaza yaan ke ham bhi hain

in ko rauzan se jhaanke ham bhi hain

jo adam ko vajud se hain gae

gard us kaarvaan ke ham bhi hain

· · ·

baagh-e-ulfat mein gul jo khud-rav hai

khun-e-bulbul kaa rang hai bu hai

aashiq-e-jaan fidaa-e-abru hai

jo mah-e-id sar-ba-zaanu hai

· · ·

dosto haal-e-dil-e-zaar zaraa us se kaho

kam na ho is mein zaraa balki sivaa us se kaho

baat ghaD kar na koi bahr-e-khudaa us se kaho

jitnaa main munh se kahun meraa kahaa us se kaho

· · ·

murgh-e-jaan ko zulf-e-pechaan jaal hai

jaal kyaa ai jaan-e-jaan janjaal hai

aao haazir sar pae paamaal hai

jaan lab par bahr-e-istiqbaal hai

· · ·

rahtaa hai mere dil mein tiraa nuur raat din

ik shoala barq-zan hai sar-e-tur raat din

maanind mehr-o-maah hasinon mein hai firaaq

kyuun ek ek se na rahe duur raat din

· · ·

dekh kar mai munh mein paani shaikh ke bhar aaegaa

chiiz achchhi dekhegaa muflis kaa ji lalchaaegaa

shoala bhaDkaa kar rahegi ye dabi aag ek din

gar vo ThanDi garmiyon se dil miraa sulgaaegaa

· · ·

tiri ai shaah-e-khubaan ho balaa chaT

vo bosa de ki ho jis ki sadaa chaT

munDaa kar khatt-e-rukh us mah-laqaa ne

kiyaa hai aaine kaa ghar safaa-chaT

· · ·

main paa-shikasta kahaan tifl-e-nai savaar kahaan

phir us ki gard kahaan aur miraa ghubaar kahaan

tumhaare vasl se Thahregaa ye dil-e-be-taab

baghair aaina simaab ko qaraar kahaan

· · ·

kabhi ai ashk-e-tar aankhon se Dhal paD

kabhi ai aah-e-dil munh se nikal paD

na ai paa-e-tasavvur itnaa shal paD

kabhi tu laa-makaan se aage chal paD

· · ·

us ki divaar kaa jo rauzan hai

khur kaa chashm-o-charaag raushan hai

lutf-e-mufrat se dost dushman hai

baarish-e-besh barq-e-khirman hai

· · ·

gaah bismil huun gahe takbir huun

apni main tadbir kaa taqdir huun

mere dam se hai junun ki aabru

paasbaan-e-khaana-e-zanjir huun

· · ·

soz se saaz kiyaa chaahiye ab

nai se aavaaz kiyaa chaahiye ab

khaa ke tir-e-nigah-e-naaz us ko

qadr-andaaz kiyaa chaahiye ab

· · ·

qais vo naatavaan-e-sahraa hai

kaalbud nistaan-e-sahraa hai

aatish-e-ishq se hai siina garm

jalva-e-barq jaan-e-sahraa hai

· · ·

mubtalaa ek but kaa hotaa huun

aaj imaan apnaa khotaa huun

tegh-e-abru ke tiir 'ishq mein yaar

jaan se apni haath dhotaa huun

· · ·