Ghazal

ab ki bezaar hi lauT aae hain gulzaaron se

rang hi le gayaa koi mere nazzaaron se

ab ye aalam hai sunaate hue Darte hain naved

baanT lete the kabhi dard bhi ham yaaron se

· · ·

zindagi kaa koi sahaaraa ho

ham kisi ke koi hamaaraa ho

teri aavaaz sun ke lagtaa hai

jaise tanhaai ne pukaaraa ho

· · ·

un kaa jaanaa to ik bahaanaa thaa

maut ko yuun bhi jald aanaa thaa

be-khudi mein use bataa baiThe

raaz jo khud se bhi chhupaanaa thaa

· · ·

vo dil nahin rahaa vo mohabbat nahin rahi

ab zindagi se koi shikaayat nahin rahi

is baar koi zakhm bhi gahraa nahin lagaa

mujh par sitamgaron ki inaayat nahin rahi

· · ·

ab tak kahin tu fikr mein aabaad hi na ho

ye iztiraab-e-qalb tiri yaad hi na ho

dhokaa na ho tumhaari nazar kaa ai bismilo

hamdard jo banaa hai vo sayyaad hi na ho

· · ·

dushvaari-e-manzil se dushvaar na ho jaaein

ham apne hi raste ki divaar na ho jaaein

zakhmon pe na bhaari ho ye chaaragari teri

achchhe bhi tire haathon bimaar na ho jaaein

· · ·

kis ko aavaaz lagaataa hai bayaabaanon mein

dil-e-naadaan nahin rahtaa koi viraanon mein

mauj-dar-mauj hi guzri hai yahaan umr apni

ham ne saahil nahin DhunDhaa kabhi tufaanon mein

· · ·

yaa-ilaahi mujhe vo tarz-e-lisaani mil jaae

qabl-e-guftaar mire lafz ko maani mil jaae

tu ne kitnon ke safinon ko kinaare bakhshe

meri kashti ko bhi ai bahr ravaani mil jaae

· · ·

kaarvaan der se tayyaar hai jaane ke liye

ham hi baiThe hain koi sog manaane ke liye

ye to ab khatm hui yaad hi karte karte

dusri 'umr mile tujh ko bhulaane ke liye

· · ·

khud ke saae se bhi hairaan nazar aataa hai

apne ghar mein bhi vo mehmaan nazar aataa hai

kis kaa chehra hai jo be-saakhta hotaa hai ayaan

khvaab bhi aankh mein hairaan nazar aataa hai

· · ·

dhundli dhundli yaadon mein ik raushan raushan chehra hai

jaanaa-pahchaanaa lagtaa hai shaayad koi apnaa hai

bikhre bikhre lamhon mein ik aisaa bhi to lamha hai

girte girte raste par jab us ne mujh ko thaamaa hai

· · ·