Ghazal

jo rang-haa-e-rukh-e-dostaan samajhte the

vo ham-nafas bhi miraa dukh kahaan samajhte the

mohabbaton mein kinaare nahin milaa karte

magar ye Dubne vaale kahaan samajhte the

· · ·

aa dekh miri aankhon mein ik baar mire yaar

raushan hain kisi hijr ke aasaar mire yaar

le jaa tu rifaaqat ke ye pal vasl kaa jangal

rahne de yahaan hijr ke aazaar mire yaar

· · ·

dasht-e-hijraan se mohabbat ko nibhaate hue ham

khaak hote hain miyaan khaak uDaate hue ham

ik 'ajab ‘aalam-e-hairat mein chale jaate hain

teri aavaaz mein aavaaz milaate hue ham

· · ·

zard mausam ki aziyyat bhi uThaane kaa nahin

main darakhton ki jagah khud ko lagaane kaa nahin

ab tire saath ta'alluq ki guzargaahon par

vaqt mushkil hai magar haath chhuDaane kaa nahin

· · ·

inkaar ki lazzat se na iqraar-e-junun se

ye hijr khulaa mujh pe kisi aur fusun se

ye jaan chali jaae magar aanch na aae

aadaab-e-mohabbat pe kisi harf-e-junun se

· · ·

girya-zaari bhi karun shor machaaun main bhi

haalat haal-e-parindon ko sunaaun main bhi

zindagi roz nayaa ruup dikhaati hai mujhe

arsa-e-jism kabhi chhoD ke jaaun main bhi

· · ·

sajda-e-yaad mein sar apnaa jhukaayaa huaa hai

ham ne ushshaaq ke rutbe ko baDhaayaa huaa hai

tohmatein hon yaa ki patthar hon muqaddar us kaa

ek divaana tire shahr mein aayaa huaa hai

· · ·

kab miri halqa-e-vahshat se rihaai hui hai

dil ne ik aur bhi zanjir banaai hui hai

aur kyaa hai mire daaman mein mohabbat ke sivaa

yahi daulat miri mehnat se kamaai hui hai

· · ·

khvaab-zada viraanon tak

pahunchi niind Thikaanon tak

aavaazon ke dariyaa mein

gharq hue ham shaanon tak

· · ·

khvaab sunne se gae ishq bataane se gae

zindagi ham tiri tauqir baDhaane se gae

ghar ke aangan mein lagaa peD kaTaa hai jab se

ham tiri baat parindon ko sunaane se gae

· · ·

aalam-e-vajd se iqraar mein aataa huaa main

qissa-e-dard banaa khvaab sunaataa huaa main

mansab-e-daar pe aayaa huun baDi shaan ke saath

haakim-e-shahr tire hosh uDaataa huaa main

· · ·

pahle vo achaanak nazar aayaa use dekhaa

phir dil ne kiyaa aur taqaazaa use dekhaa

vo husn baDi der rahaa saamne mere

phir main ne miyaan jis tarah chaahaa use dekhaa

· · ·

jiinaa ab aur na dushvaar banaao jaao

zindagi dard kaa saamaan uThaao jaao

ham mohabbat bhi 'ibaadat ki tarah karte hain

vaa'izo ham ko 'ibaadat na sikhaao jaao

· · ·

khvaab-zada viraanon tak

pahunchi niind Thikaanon tak

aavaazon ke dariyaa mein

gharq hue ham shaanon tak

· · ·

hijr ki rut kaa taraf-daar bhi ho saktaa hai

dil khasaare se samar-baar bhi ho saktaa hai

kyaa zaruri hai faqat dasht mein vahshat ho miyaan

ye tamaashaa sar-e-baazaar bhi ho saktaa hai

· · ·

main to baiThaa thaa har ik shai se kinaaraa kar ke

vaqt ne chhoD diyaa mujh ko tumhaaraa kar ke

baat dariyaa bhi kabhi ruk ke kiyaa kartaa thaa

ab to har mauj guzarti hai ishaara kar ke

· · ·

yuun bhi chhuptaa hai bhalaa vajd mein aayaa huaa rang

sab ko dikhne lagaa ehsaas pe chhaayaa huaa rang

qimti shai ki tarah main ne sanbhaalaa huaa hai

teri poshaak ke rangon se churaayaa huaa rang

· · ·

haalat-e-haal main kyaa ro ke sunaaun tujh ko

tu nazar aae to palkon pe biThaaun tujh ko

khud ko is hosh mein madhosh banaane ke liye

aayat-e-husn paDhun dekhtaa jaaun tujh ko

· · ·

main to baiThaa thaa har ik shai se kinaaraa kar ke

vaqt ne chhoD diyaa dost tumhaaraa kar ke

baat dariyaa bhi kabhi ruk ke kyaa kartaa thaa

ab to har mauj guzarti hai ishaaraa kar ke

· · ·