Ghazal

khudaa bhi kaisaa huaa khush mire qarine par

mujhe shahid kaa darja milaa hai jiine par

khanDar ke gumbad o mehraab jaag uTTheinge

use kaho ki vo dhire se aae ziine par

· · ·

yaqin aaj bhi vahm-o-gumaan mein gum hai

zamin jaise kahin aasmaan mein gum hai

ye aaftaab bhi kis zaaviye se Dhaltaa hai

zaraa si dhuup liye aan-baan mein gum hai

· · ·

main jo bad-havaas thaa mahv-e-qayaas tum bhi the

bichhaDte vaqt zaraa saa udaas tum bhi the

badalte vaqt kaa manzar thaa sab ki aankhon mein

misaal main thaa agar iqtibaas tum bhi the

· · ·

ret par ik nishaan hai shaayad

ye hamaaraa makaan hai shaayad

shor ke biich so rahi hai zamin

muddaton ki thakaan hai shaayad

· · ·

bayaabaan ko pashemaani bahut hai

ki shahron mein bayaabaani bahut hai

mire hansne pe duniyaa chaunk uTThi

mujhe bhi khud pe hairaani bahut hai

· · ·

khamoshi ki girah khole sar-e-aavaaz tak aae

ishaara koi to samjhe koi to raaz tak aae

koi anjaam kab se muntazir hai ek haazir kaa

koi rakht-e-safar baandhe koi aaghaaz tak aae

· · ·

khalvat-e-jaan se chali baat zabaan tak pahunchi

koi chingaari angeThi se dhuaan tak pahunchi

raaz o asraar ke khulne ki tavaqqo' thi kise

ik kahaani thi kisi tarah bayaan tak pahunchi

· · ·

ret ke shaanon pe shabnam ki nami raat gae

aur kuchh tez hui tishna-labi raat gae

baam o dar jaag uThe shauq ne aankhein kholin

dil ki dahliz pe dastak si hui raat gae

· · ·

khvaab ummid se sarshaar bhi ho jaae to kyaa

dasht to dasht hai baazaar bhi ho jaae to kyaa

ab kahaan koi sitaaron ko ginaa kartaa hai

meraa har zakhm numudaar bhi ho jaae to kyaa

· · ·

kis ne dekhi hai bahaaron mein khizaan mere sivaa

kaun kar saktaa hai ye qissa bayaan mere sivaa

kis ko maalum hai sahraa ki havaaon kaa mizaaj

ret par kaun banaaegaa makaan mere sivaa

· · ·

raunaq-e-arz-o-samaa shams o qamar main hi huun

ghaur se dekhiye taa-hadd-e-nazar main hi huun

ho liye saare tamaashaai kisi manzil ke

rah gayaa main so sar-e-raahguzar main hi huun

· · ·