Ghazal

dil kaa khoj na paayaa hargiz dekhaa khol jo qabron ko

jiite ji DhunDe so paave khabar karo be-khabron ko

toshak baalaa posh razaai hai bhule majnun barson tak

jab dikhlaave zulf sajan ki ban mein aavte abron ko

· · ·

kamar ki baat sunte hain ye kuchh paai nahin jaati

kahe hain baat aisi khayaal mein mere nahin aati

jo chaaho sair-e-dariyaa vaqf hai mujh chashm ki kashti

har ek mu-e-palak meraa hai goyaa ghaaT khairaati

· · ·

tere bhaai ko chaahaa ab teri kartaa huun paa-bosi

mujhe sartaaj kar rakh jaan mein aashiq huun maurusi

rafu kar de hain aisaa pyaar jo aashiq hain yaksu siin

phaDaa kar aur siin shaal apni kahtaa hai mujhe tu si

· · ·

zikr har subh o shaam hai teraa

vird-e-aashiq kuun naam hai teraa

mat kar aazaad daam-e-zulf siin dil

baal-baandhaa ghulaam hai teraa

· · ·

dekh mohan tiri kamar ki taraf

phir gayaa maani apne ghar ki taraf

jin ne dekhe tire lab-e-shirin

nazar us ki nahin shakar ki taraf

· · ·

dekhi bahaar ham ne kal zor mai-kade mein

hansne siin us sajan ke thaa shor mai-kade mein

the josh-e-mul siin aisi shorish mein daagh dil ke

goyaa ki kudte hain ye mor mai-kade mein

· · ·

ye daur guzraa kabhi na dekhin piyaa ki ankhiyaan khumaar-matiyaan

kahe the mardum sharaabi un kuun nikal gaiin apni de ghalatiyaan

sivaae gul ke vo shokh ankhiyaan kisi taraf ko nahin hain raaghib

to barg-e-nargis upar bajaa hai likhun jo apne sajan kuun patiyaan

· · ·

lab-e-shirin hai misri yusuf-e-saani hai ye laDkaa

na chhoDegaa meraa dil chaah-e-kanaani hai ye laDkaa

liyaa bosa kisi ne aur garebaan-gir hai meraa

Dubaayaa chaahtaa hai sab ko tufaani hai ye laDkaa

· · ·

ai sabaa kah bahaar ki baatein

is but-e-gul-ezaar ki baatein

kis pe chhoDe nigaah kaa shahbaaz

kyaa kare hai shikaar ki baatein

· · ·

mah-rukhaan ki jo mehrbaani hai

ye madad mujh pe aasmaani hai

rashk siin us ke saaf chehre ke

chashm par aaine ki paani hai

· · ·