Ghazal

zindagi main ne hazaaron khvaahishon mein baanT di

jaise ik tasvir TuuTe aainon mein baanT di

ranj-o-gham khauf-o-aziyyat rat-jage mahrumiyaan

dil ki basti ab hazaaron bastiyon mein baanT di

· · ·

jis ko batlaayaa ki ye ghar hai ye aangan hai miraa

mujh ko maalum nahin thaa ki vo dushman hai miraa

miri kuTiyaa hi tujhe shahr mein achchhi na lagi

main baDe naaz se kahtaa thaa ki saavan hai miraa

· · ·

khayaal is baat kaa dil se mire aksar nahin jaataa

main ghar jaane ki jaldi mein umuman ghar nahin jaataa

mujhe ik masala darpesh hai ki haath to mere

tire paanv talak jaate hain lekin sar nahin jaataa

· · ·

us ko jab yaad nahin baiTh ke ro lete hain

aa shab-e-hijr kahin baiTh ke ro lete hain

hijr ki lambi masaafat se abhi lauTe ho

paanv shal hain to yahin baiTh ke ro lete hain

· · ·

vo shakhs mujhe jab se dikhaai nahin detaa

aankhein hain magar kuchh bhi sujhaai nahin detaa

khairaat mein de dete hain rahgir ko jitni

utni bhi mohabbat mujhe bhaai nahin detaa

· · ·

is vaaste adu ko gavaaraa nahin thaa main

maaraa gayaa thaa jang mein haaraa nahin thaa main

mujh se hi mujh ko vaqt ne tafriq kar diyaa

jo tere saamne thaa vo saaraa nahin thaa main

· · ·

maaraa is shart pe ab mujh ko dobaara jaae

nok-e-neza se miraa sar na utaaraa jaae

shaam se pahle kisi hijr mein mar jaaegaa

suraj ik baar mire dil se guzaaraa jaae

· · ·

zulf ke sanvarne mein der kitni lagti hai

aadmi ke marne mein der kitni lagti hai

aankh se bhalaa dil kaa faasla hi kitnaa hai

siDhiyaan utarne mein der kitni lagti hai

· · ·

abhi ghar ke masaail hal kareinge

tiri zulfon ki baatein kal kareinge

khalaaon se palaT kar aa gae to

zaminon kaa safar paidal kareinge

· · ·

sazaa mili hai tiri mukhtasar rifaaqat ki

tamaam umr tire hijr ki hifaazat ki

utaarne bhi na di shahr ke makinon ne

tiri gali se lipaT kar thakan masaafat ki

· · ·

mabaadaa kal husn-e-be-badal par zavaal aae

ham apni aankhon ko hi khalaa mein uchhaal aae

jo tere aanchal ki sarsaraahaT pe naachtaa thaa

vo dil zarurat ki nangi mayyat pe Daal aae

· · ·

falak se khinch ke laa yaa zamin se khinch ke laa

mire buDhaape javaani kahin se khinch ke laa

chhupaa huaa hai jo iqraar us ke dil mein kahin

usi ko baandh ke us ki nahin se khinch ke laa

· · ·

ye khazaana dil-e-saudaai kise detaa main

us ki bakhshish thi ye tanhaai kise detaa main

is tire ahd ke rote hue logon mein se

haakim-e-vaqt ye shahnaai kise detaa main

· · ·

unhein khabar thi jo pahlu badal rahe the mire

main mar chukaa thaa magar saans chal rahe the mire

tire safar ki aziyyat ne mujh ko maar diyaa

to chal rahaa thaa magar paanv jal rahe the mire

· · ·

is tarah ki bhi kai moajiz-numaa amsaal de

chaar din ki zindagi mein hijr ke sau saal de

aa miri aaghosh mein be-saakhta sar rakh ke ro

aa mire kashkol mein saaraa samundar Daal de

· · ·

badan chhupaane ko kuchh mere paas thaa hi nahin

jo zeb-e-tan thaa vo meraa libaas thaa hi nahin

main jis ke hijr ko dil se lagaa ke baiThaa rahaa

vo mujh ko chhoD ke bilkul udaas thaa hi nahin

· · ·

ye kis Dar se nikaalaa jaa rahaa hai

mujhe ghar se nikaalaa jaa rahaa hai

jo manzar ko numaayaan kar rahaa thaa

vo manzar se nikaalaa jaa rahaa hai

· · ·

raqs karti hui dharti pe khaDaa kar ke mujhe

kis jagah chhoD diyaa khud se judaa kar ke mujhe

main ne thak-haar ke jab khud se rifaaqat kar li

dil ne phir chhoD diyaa meraa gila kar ke mujhe

· · ·

jab shaam-Dhale hijr tiraa mujh se milaa thaa

main ashkon ke jalte hue khemon mein khaDaa thaa

inaam-zada chehron pe khiffat thi khushi ki

darbaar mein ik tan se judaa sar bhi paDaa thaa

· · ·

tiri aankhon se jab tak dekhtaa huun

yaqin maano main rab tak dekhtaa huun

tiri aavaaz ko tajsim kar ke

tu kyaa jaane main kab tak dekhtaa huun

· · ·