Ghazal

samajh ke farz kabhi din ko raat mat karnaa

guzarte lamhon se taqsim zaat mat karnaa

bachaa ke tez havaa mein bikharnaa paDtaa hai

anaa ko nazar gham-e-haadsaat mat karnaa

· · ·

hasin dimaagh mile jaagtaa shuur mile

khudaa kare ki tujhe raaste mein nuur mile

bahut hai saaya-e-bedaar khalvat-e-gham kaa

ki khalvaton ke amiin be-khudi mein chuur mile

· · ·

main bhi insaan tu bhi insaan farq magar itnaa saa hai

mujh ko gahri choT lagi hai tu ne patthar maaraa hai

jo bhi paayaa is duniyaa se bhiik ki surat paayaa hai

saari umr ki mahrumi ne jab daaman phailaayaa hai

· · ·

paDhne vaalaa koi nahin thaa saare likhne vaale the

har ujle kaaghaz par kitne dhabbe kaale kaale the

har dam bandhaa rahaa pairon se sahraa kaa anjaan safar

ham ne us ko suraj maanaa jis ke paanv mein chhaale the

· · ·

pyaasi dharti maang rahi hai jag ke daataa paani de

saagar saagar jal-thal kar de dariyaa dariyaa paani de

tu hi avval tu hi aakhir tu hi rab tu hi maabud

duniyaa ki har ek baDaai tujh ko zebaa paani de

· · ·

puchhaa meraa naam jahaan tanhaai ne

chhaayaa likh di chehre pe gahraai ne

us din se kapDon kaa ehsaan hai tan par

mujhe chhuaa thaa jis din buDhi daai ne

· · ·

khud apni raah se ho kar kabhi guzar jaaun

rivaayaton ke dilon mein ghubaar bhar jaaun

har ik qadam hai miraa 'umr-e-be-nishaan kaa 'azaab

Thahar sakun to kisi moD par Thahar jaaun

· · ·

ek sadaaqat par marnaa hai ek sadaaqat jiinaa hai

shab ki gahraai naapi hai din ki vusat jiinaa hai

vo bhi din the divaaron par jab qurbat ke saae the

ab ghar ki chhoTi si chhat ko hijr ki saaat jiinaa hai

· · ·

sadiyon ki gahri mahrumi rahm-o-karam banaa kar de

aadhaa khuld-e-barin mein yaa-rab aadhaa khaak-e-zamin par de

mausam ke hamraah chale aate hain kuchh andeshe bhi

ek kushaada chhat ke niche pukhta divaar-o-dar de

· · ·

main ek TuuTi hui zaat le ke aayaa huun

badan pe taaza savaalaat le ke aayaa huun

jahaan se milti hai har shakhs ko mataa-e-hayaat

main us jagah se bhi khairaat le ke aayaa huun

· · ·

main hijaab-e-gumaan tu hijaab-e-yaqin

likh miri ruuh par iztiraab-e-yaqin

jab muqaddar mein be-nur taabir thi

kyon dikhaae ujaalon ne khvaab-e-yaqin

· · ·

apne uupar zulm karungaa ulTaa sidhaa sochungaa

jab tak hosh rahegaa mujh ko saari duniyaa sochungaa

sukh-dukh se haT kar insaan ko aur bhalaa jiinaa kyaa hai

baandh ke raaton ke daaman se dhuup saraapaa sochungaa

· · ·

aansu beche zakhm kharide aahon ko aadhaar kiyaa

pyaar ke naam pe ham ne jag mein ghaaTe kaa byopaar kiyaa

jis se naata toD chuke hain vo bhi jism hamaaraa hai

vo bhi apnaa hi chehra hai jis se ham ne pyaar kiyaa

· · ·

baadal jab unche parbat par dhund ki chaadar taan gae

kyaa kyaa barsegaa miTTi par saare saae jaan gae

phir dilli ke takht pe aa baiThaa hai koi naadir-shaah

rangat khushbu tak aaegi is ke bhi imkaan gae

· · ·

khvaabon ki vaadiyon mein dilon ko phiraae hai

dariyaa mein jab bhi lahr koi sar uThaae hai

nas nas mein rach gayaa hai takallum kaa baankpan

aankhon ki khaamushi bhi mujhe gudgudaae hai

· · ·

aarzu sulagti hai ho ke mas havaaon se

aag si barasti hai saavani ghaTaaon se

bebasi-e-aadam kaa gham to khair sab ko hai

kaun bhiik maangegaa rahm ke khudaaon se

· · ·

aatishin sailaab mein jab ruuh Daali jaaegi

tishnagi sadiyon ki ashkon se bujhaa li jaaegi

TuTti divaar kaa saaya badan ki aabru

jaane kab mere yaqin ki khush-khayaali jaaegi

· · ·

koi shaadaab-o-hasin shahr kaa manzar dekho

jhaank kar rauzan-e-ehsaas se baahar dekho

meri aavaaz miraa jism miraa chehra hai

ho jo mumkin to mujhe haath lagaa kar dekho

· · ·

khvaab rakhe hain taariki par dard rakhaa hai raaton par

aag lagaai hai ashkon ne tohmat hai angaaron par

suraj chaahe aae na aae haal puchhne basti kaa

sab ne ummidein rakh di hain ab be-nur charaaghon par

· · ·

qadam qadam aasmaan bhi misl-e-zamin hai mujh ko

ye kaaenaat-e-nigaah bait-e-yaqin hai mujh ko

libaas ban kar jo roz-o-shab ke badan pe jaagaa

vo zindagi kaa vajud hi dil-nashin hai mujh ko

· · ·

zindagi ko naa-muraadi se koi shikva nahin

ab agar patthar se Takraaun to sar phahTtaa nahin

pi rahi hai qatra qatra mere khvaabon kaa lahu

main huun duniyaa ke liye mere liye duniyaa nahin

· · ·

basirat se abhi mahrum hain sab

manaazir shahr ke maasum hain sab

koi miltaa nahin hans kar kisi se

na jaane kis liye maghmum hain sab

· · ·

bahte dariyaa tham jaaeinge thoDaa vaqt guzarne do

vo bhi ab na yaad aaeinge thoDaa vaqt guzarne do

nae nae un se bichhDe hain taaza hain saare aansu

ye mausam bhi murjhaaeinge thoDaa vaqt guzarne do

· · ·