Ghazal

apne girne ki khabar tak nahin paai main ne

aakhiri dauD mein vo jaan lagaai main ne

saans ko saans hi marne nahin deti hai yahaan

koshishein kar ke bahut dekh liin bhaai main ne

· · ·

mizaaj puchhte rahte ho mujh se kyon meraa

ki jab samajh na sake jazb-e-andrun meraa

vo dekh nok-e-sinaan ki bulandiyon ki taraf

sipaah-e-zulm na kar paai sar nigun meraa

· · ·

jab raat kaa aaseb bikhar jaataa hai mujh mein

andar koi bachcha saa hai Dar jaataa hai mujh mein

dil par kisi qadmon ke nishaan tak nahin milte

ye kaun hai tezi se guzar jaataa hai mujh mein

· · ·

ye rut azaa ki hai shahr-e-hazin se guzregaa

luTe huon kaa qabila yahin se guzregaa

mujhe bachaa le mire yaar soz-e-imshab se

ki ik sitaara-e-vahshat jabin se guzregaa

· · ·

dil ko rone ke liye aankh mein bas paani hai

aalam-e-zaat mein kyaa be-sar-o-saamaani hai

tishna-lab aisaa ki honTon pe paDe hain chhaale

mutmain aisaa huun dariyaa ko bhi hairaani hai

· · ·

subh-e-ummid ki ik sham' jalaai gai thi

is tarah mamlikat-e-jism bachaai gai thi

kitnaa be-faiz zamaana thaa ki khvaahish meri

gosha-e-dil mein taDapti hui paai gai thi

· · ·

samundaron ke safar par hain rahnumaa bhi nahin

ham aise logon ki kashti kaa naakhudaa bhi nahin

yaqin-e-dil ke liye aalam-e-gumaani mein

use pukaar rahaa huun to sun rahaa bhi nahin

· · ·

ham apne aap ko aise ganvaane lagte hain

bahut khushi ho to maatam manaane lagte hain

akelaa-pan hai aur aisaa akelaa-pan jis mein

koi jo puchh le kuchh sab bataane lagte hain

· · ·

is Thahraav se pahle bataaein kaise rahte the

ham dariyaa the apni mauj mein bahte rahte the

us ke ghalat ravayye par chup rahnaa paDtaa thaa

laD sakte the us se magar ham sahte rahte the

· · ·

akelaa main hi nahin hijr ki savaari mein

kuchh aur log bhi shaamil hain shab-guzaari mein

nadi se kah do idhar tishnagi balaa ki hai

ye suukh jaaegi sahraa ki aabyaari mein

· · ·