Ghazal

piite hi surkh aankhein hain mast-e-sharaab ki

garmi to dekho Duube hue aaftaab ki

rukh se judaa jo hashr mein tum ne naqaab ki

duniyaa ye taab laaegi do aaftaab ki

· · ·

yuun tumhaare naa-tavaan-e-shauq manzil bhar chale

khaai Thokar gir paDe gir kar uThe uTh kar chale

chhoD kar bimaar ko ye kyaa qayaamat kar chale

dam nikalne bhi na paayaa aap apne ghar chale

· · ·

karte bhi kyaa huzur na jab apne ghar mile

dushman se ham kabhi na mile the magar mile

bulbul pe aisi barq giri aandhiyon ke saath

ghar kaa pata chalaa na kahin baal-o-par mile

· · ·

ab to munh se bol mujh ko dekh din bhar ho gayaa

ai but-e-khaamosh kyaa sach-much kaa patthar ho gayaa

ab to chup ho baagh mein naalon se mahshar ho gayaa

ye bhi ai bulbul koi sayyaad kaa ghar ho gayaa

· · ·

hukm-e-sayyaad hai taa-khatm-e-tamaashaa-e-bahaar

saari duniyaa kahe bulbul na kahe haae bahaar

subh gul-gasht ko jaate ho ki sharmaae bahaar

kyaa ye matlab hai gulistaan se nikal jaae bahaar

· · ·

kaun se the vo tumhaare ahd jo TuuTe na the

khair in baaton mein kyaa rakkhaa hai tum jhuTe na the

baaghbaan kuchh soch kar ham qaid se chhuTe na the

varna kuchh paanv na the be-kaar par TuuTe na the

· · ·

abru to dikhaa dijiye shamshir se pahle

taqsir to kuchh ho miri taazir se pahle

maalum huaa ab miri qismat mein nahin tum

milnaa thaa mujhe kaatib-e-taqdir se pahle

· · ·

kisi surat sahar nahin hoti

raat idhar se udhar nahin hoti

khauf sayyaad se na barq kaa Dar

baat ye apne ghar nahin hoti

· · ·

mujhe baaghbaan se gila ye hai ki chaman se be-khabari rahi

ki hai nakhl-e-gul kaa to zikr kyaa koi shaakh tak na hari rahi

miraa haal dekh ke saaqiyaa koi baada-khvaar na pi sakaa

tire jaam khaali na ho sake miri chashm-e-tar na bhari rahi

· · ·

dekhiye ho gai badnaam masihaai bhi

ham na kahte the ki Talti hai kahin aai bhi

husn khuddaar ho to baais-e-shohrat hai zarur

lekin in baaton mein ho jaati hai rusvaai bhi

· · ·

saans un ke mariz-e-hasrat ki ruk ruk ke chalti jaati hai

maayus nazar hai dar ki taraf aur jaan nikalti jaati hai

chehre se sarakti jaati hai zulf un ki khvaab ke aalam mein

vo hain ki abhi tak hosh nahin aur shab hai ki Dhalti jaati hai

· · ·

savaal chhoD ki haalat ye kyuun banaai hai

use na sun jo kahaani suni-sunaai hai

patangaa shama pe martaa hai kyaa buraai hai

use kisi ne bhi rokaa hai jis ki aai hai

· · ·

un ke jaate hi ye vahshat kaa asar dekhaa kiye

su-e-dar dekhaa to pahron su-e-dar dekhaa kiye

dil ko vo kyaa dekhte soz-e-jigar dekhaa kiye

lag rahi thi aag jis ghar mein vo ghar dekhaa kiye

· · ·

dekhte hain raqs mein din raat paimaane ko ham

saaqiyaa raas aa gae hain tere mai-khaane ko ham

le ke apne saath ik khaamosh divaane ko ham

jaa rahe hain hazrat-e-naaseh ko samjhaane ko ham

· · ·

aah ko samjhe ho kyaa dil se agar ho jaaegi

vo to vo un ke farishton ko khabar ho jaaegi

puuri kyaa muusaa tamannaa tuur par ho jaaegi

tum agar uupar gae nichi nazar ho jaaegi

· · ·