aur kuchh der lab pe aah rahe — Ada Jafarey

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

jis ki jaanib 'adaa' nazar na uThi
haal us kaa bhi mere haal saa thaa

hazaar kos nigaahon se dil ki manzil tak
koi qarib se dekhe to ham ko pahchaane

dil ke viraane mein ghume to bhaTak jaaoge
raunaq-e-kucha-o-baazaar se aage na baDho

kuchh itni raushni mein the chehron ke aaine
dil us ko DhunDhtaa thaa jise jaantaa na thaa

bas ek baar manaayaa thaa jashn-e-mahrumi
phir us ke baad koi ibtilaa nahin aai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

yaad aai hai to phir TuuT ke yaad aai hai
koi guzri hui manzil koi bhuli hui dost