hadd-e-gumaan se ek shakhs duur kahin chalaa gayaa — Ahmad Shahryar

tujh se bhi kab hui tadbir miri vahshat ki
tu bhi muTThi mein kahaan bheinch sakaa paani ko

khvaab-e-ziyaan hain umr kaa khvaab hain haasil-e-hayaat
is kaa bhi thaa yaqin mujhe vo bhi mire gumaan mein thaa

samaai kis tarah meri aankhon ki putliyon mein
vo ek hairat jo aaine se bahut baDi thi

na dastakein na sadaa kaun dar pe aayaa hai
faqir-e-shahr hai yaa shahryaar dekhiyegaa

saalgirah par kitni nek tamannaaein mausul huiin
lekin in mein ek mubaarakbaad abhi tak baaqi hai

qatra Thiik hai dariyaa hone mein nuqsaan bahut hai
dekh to kaise Duub rahaa hai meraa lashkar mujh mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa