kisi ke vaaste tasvir-e-intizaar the ham — Aleena Itrat

dil ke gulshan mein tire pyaar ki khushbu paa kar
rang rukhsaar pe phulon se khilaa karte hain

husn-o-jamaal-o-zist ki aaraaishein fuzul
ishq-o-junun ki aag jo dil mein javaan na ho

lo hamaaraa javaab le jaao
ye mahaktaa gulaab le jaao

Thiik hai jaao ta'alluq na rakheinge ham bhi
tum bhi vaada karo ab yaad nahin aaoge

jin ke mazbut iraade bane pahchaan un ki
manzilein aap hi ho jaati hain aasaan un ki

khvaahishein khvaab dikhaati hain tire milne kaa
khvaab se kah de ki taabir ki surat aae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

ye na thi hamaari qismat ki visaal-e-yaar hotaa
agar aur jiite rahte yahi intizaar hotaa

hai khushi intizaar ki har dam
main ye kyuun puchhun kab mileinge aap

muntazir sab mire zavaal ke hain
mere ahbaab bhi kamaal ke hain