'aarif-shafiq' koi na aage nikal sakaa — Arif Shafiq

jab koi ahm faisla karnaa
apne bachchon se mashvara karnaa

yaqin ab ho gayaa main sach huun 'aarif
jabhi duniyaa mujhe jhuTlaa rahi hai

gharib-e-shahr to faaqe se mar gayaa 'aarif'
amir-e-shahr ne hiire se khud-kushi kar li

andhe adam vajud ke girdaab se nikal
ye zindagi bhi khvaab hai tu khvaab se nikal

'aarif vo faisle ki ghaDi bhi 'ajib thi
dil ko sanbhaalnaa paDaa mizaan ki tarah

mujhe khudaa ne vo bakhshaa hai shaa'iri kaa hunar
jo khvaab dekhtaa huun vo dikhaa bhi saktaa huun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

yaad aai hai to phir TuuT ke yaad aai hai
koi guzri hui manzil koi bhuli hui dost

meri taqdir mein manzil nahin hai
ghubaar-e-kaarvaan hai aur main huun