jism paaband-e-gul sahi 'aabid' — Asghar Abid

ham to us pasti-e-ehsaas pe jiite hain jahaan
ye bhi maalum nahin jiit hai kyaa maat hai kyaa

ujlat ke alaav mein kiye faisle 'aabid'
ab soch ki barfaani khaDaaun pe khaDe hain

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

rok bhi to ham nahin sakte the jaane vaale ko
baad us ke dil kisi se bhi lagaayaa na gayaa

suni na ek bhi zaalim ne aarzu dil ki
ye kis ke saamne ham arz-e-haal kar baiThe

ik lafz-e-mohabbat kaa adnaa ye fasaanaa hai
simTe to dil-e-aashiq phaile to zamaana hai

zarre zarre mein mahak pyaar ki Daali jaae
bu taassub ki har ik dil se nikaali jaae