Shayari Of Jurat Qalandar Bakhsh

ye savād-e-shahr aur aisā kahāñ husn-e-malīh
shash-jihat meñ mulk dekhā hī nahīñ punjab sā

ilāhī kyā ilāqa hai vo jab letā hai añgḌā.ī
mire siine meñ sab zaḳhmoñ ke Tāñke TuuT jaate haiñ

khaa.e so pachhtā.e aur pachhtā.e vo bhī jo na khaa.e
ye ġham-e-ishq-e-butāñ laDDū hai goyā bor kā

haiñ lāzim-o-malzūm baham husn o mohabbat
ham hote na tālib jo vo matlūb na hotā

Thahrī thī ġhizā apnī jo ġham ishq-e-butāñ meñ
so aah hamārī hameñ ḳhūrāk ne khāyā

dil-e-vahshī ko ḳhvāhish hai tumhāre dar pe aane kī
divānā hai va-lekin baat kartā hai Thikāne kī

kaifiyat mahfil-e-ḳhūbāñ kī na us bin pūchho
us ko dekhūñ na to phir de mujhe dikhlā.ī kyā

lagte hī haath ke jo khīñche hai ruuh tan se
kyā jāneñ kyā vo shai hai us ke badan ke andar

pūchho na kuchh sabab mire hāl-e-tabāh kā
ulfat kā ye samar hai natīja hai chaah kā

ik bosa māñgtā huuñ maiñ ḳhairāt-e-husn kī
do maal kī zakāt ki daulat ziyāda ho

jab talak ham na chāhte the tujhe
tab tak aisā tirā jamāl na thā

us zulf pe phabtī shab-e-dījūr kī sūjhī
andhe ko añdhere meñ baḌī duur kī sūjhī