ham qaafile se bichhDe hue hain magar 'nabil' — Aziz Nabeel

tumhaaraa saath agar ho to joD saktaa huun
vo silsila jo sar-e-daastaan TuuT gayaa

roz dastak si koi detaa hai siine mein 'nabil'
roz mujh mein kisi aavaaz ke par khulte hain

khaamushi TuTegi aavaaz kaa patthar bhi to ho
jis qadar shor hai andar kabhi baahar bhi to ho

ek takhti amn ke paighaam ki
Taang diije unche minaaron ke beach

phir nae saal ki sarhad pe khaDe hain ham log
raakh ho jaaegaa ye saal bhi hairat kaisi

main agar TuuTaa to saaraa shahr bikhregaa 'nabil'
aisaa patthar huun fasil-e-shahr ki buniyaad kaa

tujh ko hai ham se judaai aarzu
mere dil mein shauq hai didaar kaa

chup-chaap sunti rahti hai pahron shab-e-firaaq
tasvir-e-yaar ko hai miri guftugu pasand

ye amal ret ko paani nahin banne detaa
pyaas ko apni saraabon se alag rakhtaa huun

dil ke har juzv mein judaai hai
dard uThe aabla agar baiThe

amir-e-kaarvaan hai tang ham se
hamaaraa raastaa sab se alag hai

bikher de mujhe chaaron taraf khalaaon mein
kuchh is tarah se alag kar ki juD na paaun main