dil ke zakhmon ki chubhan dida-e-tar se puchho — Bushra Hashmi

arsa huaa kisi ne pukaaraa nahin mujhe
shaayad kisi ko meri zarurat nahin rahi

sarmaaya-e-hayaat huaa chaahtaa hai khatm
jis par ghurur thaa vahi daulat nahin rahi

vahi lafz hain durr-e-be-bahaa mire vaaste
jinhein chhu gai ho tiri zabaan mire mehrbaan

jo na kaT sakaa vo nishaan thaa kisi zakhm kaa
jo na mil sakaa vo saraab thaa koi khvaab thaa

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

dil-e-haris hi apnaa na ho sakaa qaane
vagarna tere karam mein to kuchh kami na rahi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

main badalte hue haalaat mein Dhal jaataa huun
dekhne vaale adaakaar samajhte hain mujhe