us ke dil se nikle to ham khud ke dil tak aa pahunche — Devang Thakur

sab ko bataa diyaa ki main behad udaas huun
itni si baat ko bhi khabar kar diyaa gayaa

ghar ke andar itne ghar hain is ko kaise toDun main
yaar kabutar rahte hain is ghar ke raushan-daanon mein

tumhein dekhtaa huun so zinda huun main
mujhe saans aati hai aankhon se ab

sar paTak kar dekhnaa hai ek baar
'ishq ko patthar kahaa thaa 'mir' ne

milnaa hai teri ruuh se ham ko badan baghair
apnaa libaas-e-jism utaare hue hain ham

mire zavaal ki koi to had muqarrar kar
tiri nazar se musalsal utar rahaa huun main

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

'saif' andaaz-e-bayaan rang badal detaa hai
varna duniyaa mein koi baat nai baat nahin

badan ke karb ko vo bhi samajh na paaegaa
main dil mein roungi aankhon mein muskuraaungi