chashm-e-saaqi mujhe har gaam pe yaad aati hai — Iqbal Safi Puri

mire labon kaa tabassum to sab ne dekh liyaa
jo dil pe biit rahi hai vo koi kyaa jaane

koi samjhaae ki kyaa rang hai maikhaane kaa
aankh saaqi ki uThe naam ho paimaane kaa

kaun jaane ki ik tabassum se
kitne mafhum-e-gham nikalte hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

rahne de taklif-e-tavajjoh dil ko hai aaraam bahut
hijr mein teri yaad bahut hai gham mein teraa naam bahut

use to daulat-e-duniyaa bhi kam bhi paane ko
miri to zaat kaa mizaan bhi ziyaada nahin

tamaam ishq ki mohlat hai is aankhon mein
aur ek lamha-e-imkaan bhi ziyaada nahin

aashiyaan jalne pe buniyaad nai paDti hai
aks-e-takhrib ko aaina-e-taamir kaho