Unwan Chishti

husn hi to nahin betaab-e-numaaish 'unvaan'
ishq bhi aaj nai jalvagari maange hai

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

vo haadse bhi dahr mein ham par guzar gae
jiine ki aarzu mein kai baar mar gae

aap se chuuk ho gai shaayad
aap aur mujh pe mehrbaan kyaa khuub

ishq phir ishq hai aashufta-sari maange hai
hosh ke daur mein bhi jaama-dari maange hai

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai

rahne de taklif-e-tavajjoh dil ko hai aaraam bahut
hijr mein teri yaad bahut hai gham mein teraa naam bahut

is kaar-e-numaayaan ke shaahid hain chaman vaale
gulshan mein bahaaron ko laae the hamin pahle

kuchh to bataao ai farzaano divaanon par kyaa guzri
shahr-e-tamannaa ki galiyon mein barpaa hai kohraam bahut