piine se kar chukaa thaa main tauba magar 'jalil' — Jaleel Manikpuri

aaj hai vo bahaar kaa mausam
phuul toDun to haath jaam aae

pyaari surat vo haae kyaa hogi
jis ko be-dekhe pyaar aataa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

mohabbat ek taraf se mazaa nahin deti
kuchh iztiraab tujhe ho kuchh iztiraab mujhe

jo tire ishq mein tabaah huaa
koi us ko tabaah kar na sakaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

hai shaam-e-avadh gesu-e-dildaar kaa partav
aur subh-e-banaras hai rukh-e-yaar kaa partav

kaaba-o-dair-o-kalisaa kaa tajassus kyuun ho
jab mire qalb hi mein meraa khudaa hai yaaro

shab-e-firaaq kai baar gosha-e-dil se
uThi to aah magar aah be-asar uTThi

ruton ke rang badalte hue bhi banjar hai
vo ek khaas ilaaqa jo dil ke andar hai