tamaam raat nahaayaa thaa shahr baarish mein — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

kisi bhi vaqt badal saktaa hai lamha koi
is qadar khush bhi na ho meri pareshaani par

vo log mere bahut pyaar karne vaale the
guzar gae hain jo mausam guzarne vaale the

vo bhi milne nai poshaak badal kar aayaa
main jo kal pairahan-e-khaak badal kar aayaa

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

kaTaa thaa roz-e-musibat khudaa khudaa kar ke
ye raat aai ki sar pe mire azaab aayaa

har-dam ye duaa maangte rahte hain khudaa se
allaah bachaae shab-e-furqat ki balaa se