ik baras bhi abhi nahin guzraa — Kaif Ahmed Siddiqui

aaj kuchh aise shoale bhaDke baarish ke har qatre se
dhuup panaahein maang rahi hai bhige hue darakhton mein

tanhaaiyon ko saunp ke taarikiyon kaa zahr
raaton ko bhaag aae ham apne makaan se

khudaa maalum kis aavaaz ke pyaase parinde
vo dekho khaamushi ki jhiil mein utre parinde

'kaif' kahaan tak tum khud ko be-daagh rakhkhoge
ab to saari duniyaa ke munh par syaahi hai

sard jazbe bujhe bujhe chehre
jism zinda hain mar gae chehre

khushi ki aarzu kyaa dil mein Thahre
tire gham ne biThaa rakkhe hain pahre

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand ne taan li hai chaadar-e-abr
ab vo kapDe badal rahi hogi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh