ye kaun chupke chupke uThaa aur chal diyaa — Khatir Ghaznavi

insaan huun ghir gayaa huun zamin ke khudaaon mein
ab bastiyaan basaaungaa jaa kar khalaaon mein

ek ek kar ke log nikal aae dhuup mein
jalne lage the jaise sabhi ghar ki chhaanv mein

'khaatir' ab ahl-e-dil bhi bane hain zamaana-saaz
kis se karein vafaa ki talab apne shahr mein

go zaraa si baat par barson ke yaaraane gae
lekin itnaa to huaa kuchh log pahchaane gae

ik tajassus dil mein hai ye kyaa huaa kaise huaa
jo kabhi apnaa na thaa vo ghair kaa kaise huaa

kaisi chali hai ab ke havaa tere shahr mein
bande bhi ho gae hain khudaa tere shahr mein

main baDaa ho gayaa huun magar bachpanaa
mere dil se kabhi bhi gayaa hi nahin

ab na aaeinge ruThne vaale
dida-e-ashk-baar chup ho jaa

jaane kyuun rang-e-baghaavat nahin chhupne paataa
ham to khaamosh bhi hain sar bhi jhukaae hue hain

shor machaa deti hai us ki khaamoshi
bole to phir sannaaTaa chhaa jaataa hai

is liye chup hain ki koi nahin sunne vaalaa
varna kahne ko saraapaa lab-e-goyaa ham hain

khaamosh sahi markazi kirdaar to ham the
phir kaise bhalaa teri kahaani se nikalte