ye dil had se guzarnaa chaahtaa thaa — Khawer Eijaz

mire aur us ke biich ik dhund si maujud rahti hai
ye duniyaa aa rahi hai mere us ke darmiyaan shaayad

ik arse baad hui khul ke guftugu us se
ik arse baad vo kaanTaa chubhaa huaa niklaa

haath lagaate hi miTTi kaa Dher hue
kaise kaise rang bhare the khvaabon mein

zavaal-e-ahd to shaayad mujhe na pahchaane
main ik havaala huun aur karbalaa se aayaa huun

makaan nazdik hai yaa laa-makaan nazdik paDtaa hai
kahin aa jaao mujh ko har jahaan nazdik paDtaa hai

badal liyaa hai zaraa khvaab ke ilaaqe ko
makaan ko chhoD ke ab laa-makaan mein rahtaa huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ham mein baaqi nahin ab khaalid-e-jaan-baaz kaa rang
dil pe ghaalib hai faqat hafiz-e-shiraaz kaa rang

dil ki taklif kam nahin karte
ab koi shikva ham nahin karte

ashk Dhalte nahin dekhe jaate
dil pighalte nahin dekhe jaate

ye do-dili mein rahaa ghar na ghaaT kaa 'anjum'
buton ko kar na sakaa khush khudaa ko paa na sakaa