Anjum Manpuri

vaaiz ki kaDvi baaton ko kab dhyaan mein apne laate hain

واعظ کی کڑوی باتوں کو کب دھیان میں اپنے لاتے ہیں یہ رند بلا نوش ایسے ہیں سنتے ہیں اور پی جاتے ہیں ہم آپ سے جو کچھ کہتے ہیں وہ بالکل جھوٹ غلط اک دم اور آپ جو کچھ فرماتے ہیں بے شبہ بجا فرماتے ہیں دیوانہ سمجھ کر چھیڑ کے وہ سنتے ہیں ہماری باتوں کو ہم مطلب کی کہہ جاتے ہیں وہ سوچ کے کچھ رہ جاتے ہیں مجبور محبت کی حالت بیگانۂ الفت کیا جانے ہم غیروں کے طعنے سنتے ہیں اور سن کر چپ رہ جاتے ہیں گردن ہے جھکی نظریں نیچی اور لب پہ ہے ان کے تبسم بھی ہے قابل دید وہ شوخی بھی جس وقت کہ وہ شرماتے ہیں بے ہوش پڑے ہیں عشق میں اور سر ہے کسی کے زانو پر تدبیریں لاکھ کرے کوئی اب ہوش میں ہم کب آتے ہیں کام انجمؔ کا جو تمام کیا یہ آپ نے واقعی خوب کیا کم بخت اسی کے لائق تھا اب آپ عبث پچھتاتے ہیں

adu to kyaa ye falak bhi use sataa na sakaa

عدو تو کیا یہ فلک بھی اسے ستا نہ سکا خوشی ہنسا نہ سکی غم جسے رلا نہ سکا نہ پوچھ اس کی دل افسردگی کی کیفیت جو غم نصیب خوشی میں بھی مسکرا نہ سکا وہ پوچھ بیٹھے یکایک جو وجہ بے تابی کھجا کے رہ گیا سر بات کچھ بنا نہ سکا وہ دیکھ لیں نہ کہیں میری چشم پر نم کو گیا تو ملنے کو آنکھیں مگر ملا نہ سکا یہ دو دلی میں رہا گھر نہ گھاٹ کا انجمؔ بتوں کو کر نہ سکا خوش خدا کو پا نہ سکا

dil bhar aayaa phir bhi raaz-e-dil chhupaanaa hi paDaa

دل بھر آیا پھر بھی راز دل چھپانا ہی پڑا سامنے اس بد گماں کے مسکرانا ہی پڑا وہ جو روٹھے میں نے بھی کھا لی نہ ملنے کی قسم پھر نہ دل مانا تو خود جا کر منانا ہی پڑا اف ری مجبوری مزاج یار میں ہو کر دخیل راز داں خود اپنے دشمن کو بنانا ہی پڑا مجھ کو فصل گل میں تیور دیکھ کر صیاد کے آشیانہ چھوڑ کر گلشن سے جانا ہی پڑا ضبط کا یارا نہیں صیاد کا بھی ہے خیال نالہ‌‌ٔ دل سوز کو نغمہ بنانا ہی پڑا روکتے کب تک تقاضائے تلافیٔ ستم سر جھکائے شرم سے میت پہ آنا ہی پڑا آج انجمؔ مسکرا کر اس نے پھر دیکھا مجھے شکوۂ جور و جفا پھر بھول جانا ہی پڑا