haath lagaate hi miTTi kaa Dher hue — Khawer Eijaz

mire aur us ke biich ik dhund si maujud rahti hai
ye duniyaa aa rahi hai mere us ke darmiyaan shaayad

badal liyaa hai zaraa khvaab ke ilaaqe ko
makaan ko chhoD ke ab laa-makaan mein rahtaa huun

ye dil had se guzarnaa chaahtaa thaa
magar majbur ho kar rah gayaa hai

sunaa rahi hai jise joD joD kar duniyaa
tamaam TukDe hain vo meri daastaan ke hi

mire sehan par khulaa aasmaan rahe ki main
use dhuup chhaanv mein baanTanaa nahin chaahtaa

jahaan tum ho vahaan se duur paDti hai zamin meri
jahaan main huun vahaan se aasmaan nazdik paDtaa hai

mere khvaabon ke jharokon ko sajaate rahiye
na sahi vasl magar yaad to aate rahiye

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

khvaab mein toDtaa rahtaa huun anaa ki zanjir
aankh khulti hai to divaar nikal aati hai