nazm-e-jahaan ko zer-o-zabar dekhtaa huun main — Machis Lakhnavi

DhunDiye khair se jaa kar koi moTi sasuraal
haath jo muft mein aae to vo maal achchhaa hai

hukm begam ke chalaa karte hain jelar ki tarah
ab miraa ghar bhi mujhe jail huaa jaataa hai

aur to kuchh bhi nahin hazrat-e-'maachis' lekin
aap mein aag lagaane kaa kamaal achchhaa hai

buton par main agar maail huun vo huron pe maail hain
janaab-e-shaikh mein bhi ye himaaqat paai jaati hai

mire par us ko sau durre na kahiye phir to kyaa kahiye
tire aashiq ki mayyat doctor-khaane mein rakkhi hai

vaaiz ne mujh mein dekhi hai imaan ki kami
vaaiz mein sirf dum ki kasar dekhtaa huun main

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

jab ki pahlu se yaar uThtaa hai
dard be-ikhtiyaar uThtaa hai

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin