Machis Lakhnavi

vo un kaa zamaana thaa jahaan aql baDi thi
ye meraa zamaana hai yahaan bhains baDi hai

vaaiz ko jo dekho to ghaTaa-Top andheraa
saaqi ko jo dekho to kiran phuuT rahi hai

taadaad mein hain aurtein mardon se zyaada
qavvaaliyaan maujud hain qavvaal nadaarat

jaise islaam mein hai rasm musalmaani ki
vaise hi ishq mein hai chaak-garebaani ki

jo bhi haaregaa vahi gaaliyaan degaa us ko
jis barahman ne kahaa hai ki ye saal achchhaa hai

is qadar sarf ilaahi mire khun-e-dil kaa
ab mohabbat kaa bajaT fail huaa jaataa hai

allaah-re roab-o-daab-e-junun bhaagtaa hai vo
jis ki taraf uThaa ke nazar dekhtaa huun main

saae ki tamannaa mein jahaan baiTh gayaa huun
chandiyaa pe vahin taak ke divaar giri hai

havaadis jab kisi ko taak kar chaanTaa lagaate hain
to hafton kyaa mahinon khopaDi sahlaai jaati hai

nazm-e-jahaan ko zer-o-zabar dekhtaa huun main
maada ke ikhtiyaar mein nar dekhtaa huun main

vaaiz ne mujh mein dekhi hai imaan ki kami
vaaiz mein sirf dum ki kasar dekhtaa huun main

DhunDiye khair se jaa kar koi moTi sasuraal
haath jo muft mein aae to vo maal achchhaa hai