baarishein us kaa lab-o-lahja pahan leti thiin — Mansoor Aafaque

vo tiraa unchi haveli ke qafas mein rahnaa
yaad aae to parindon ko rihaa kartaa huun

qayaam kartaa huun akasr main dil ke kamre mein
ki jam na jaae kahin gard us ki chizon par

tujh aisi narm garm kai laDkiyon ke saath
main ne shab-e-firaaq Dubo di sharaab mein

aa giraa zinda shamshaan mein lakDiyon kaa dhuaan dekh kar
ik musaafir parinda kai sard raaton kaa maaraa huaa

bas ek raat se kaise thakan utarti hai
badan ko chaahiye aaraam kuchh ziyaada hi

bas ek lunch hi mumkin thaa jaldi jaldi mein
use bhi jaanaa thaa mujh ko bhi kaam karnaa thaa

pyaaso raho na dasht mein baarish ke muntazir
maaro zamin pe paanv ki paani nikal paDe

be-khudi ne kar diyaa jazbaat-e-dil se be-niyaaz
ab tiraa milnaa na milnaa sab baraabar ho gayaa

baras rahi thi baarish baahar
aur vo bhiig rahaa thaa mujh mein

do baadal aapas mein mile the phir aisi barsaat hui
jism ne jism se sargoshi ki ruuh ki ruuh se baat hui

ye garajnaa baadalon kaa yuun lage
baat mujh se kartaa ho jaise khudaa

chhup jaaein kahin aa ki bahut tez hai baarish
ye mere tire jism to miTTi ke bane hain