ab ise gharqaab karne kaa hunar bhi siikh luun — Nomaan Shauque

is baar intizaam to sardi kaa ho gayaa
kyaa haal peD kaTte hi basti kaa ho gayaa

vo saanp jis ne mujhe aaj tak Dasaa bhi nahin
tamaam zahr sukhan mein mire usi kaa hai

phir is mazaaq ko jamhuriyat kaa naam diyaa
hamein Daraane lage vo hamaari taaqat se

apni aahaT pe chaunktaa huun main
kis ki duniyaa mein aa gayaa huun main

vo tanz ko bhi husn-e-talab jaan khush hue
ulTaa paDhaa gayaa, miraa paighaam aur thaa

bas tire aane ki ik afvaah kaa aisaa asar
kaise kaise log the bimaar achchhe ho gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

hamesha tinke hi chunte guzar gai apni
magar chaman mein kahin aashiyaan banaa na sake

udaasi ab kisi kaa rang jamne hi nahin deti
kahaan tak phuul barsaae koi gor-e-gharibaan par

ab chaman mein bhi kisi surat se ji lagtaa nahin
haan magar jab tak qafas mein the qafas badnaam thaa