kiije izhaar-e-mohabbat chaahe jo anjaam ho — Priyamvada Ilhan

idhar aate un ke qadam dekhte hain
sitam hai ki hai ye karam dekhte hain

— Priyamvada Ilhan

bahut milne se aib dikhte hain kam-kam
bahut dekhte hain jo kam dekhte hain

— Priyamvada Ilhan

ham sahraa vaale hain badraa ye prem ki rim-jhim aur kahin
aanaa hai yahaan to aaiyo tu jam kar jham-jham karne ke liye

— Priyamvada Ilhan

jo kahkashaan si nazar aati hain miri aankhein
guzishta shab ke ye aansu hain jo sitaare hue

— Priyamvada Ilhan

zaraa si baat nahin hai kisi kaa ho jaanaa
ki umr lagti hai but ko khudaa banaane mein

— Priyamvada Ilhan

dil ko honaa hai fanaa rahnaa hai qaaem aql ko
hasti-e-aadam kahaan jaae ye fitrat chhoD kar

— Priyamvada Ilhan

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi