Dhal gai vasl ki shab Duub gayaa dil kaa charaagh — Sahar Alig

sharm-o-hayaa ne baaz rakhaa is qadar hamein
saayaa bhi un kaa dekh ke ham sar-nigun karein

main duniyaa chaahti huun na duniyaa ki rif'atein
meri talab najaat hai bas aur kuchh nahin

ek moti huun main moti bhi baDaa qimti huun
par vo moti jo abhi gum hai samundar mein kahin

shaahzaade hon vali hon ki sukhan-daan-e-shahr
jab vo dikhtaa hai koi aur kahaan dikhtaa hai

ye jabr hai 'izzat hai mohabbat hai ki kyaa hai
banti hi nahin aap se inkaar ki surat

DhunDaa kiye khudaa ko magar mil nahin sakaa
masjid mein but-kade mein kalisaa mein dair mein

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

tum ne kyuun dil mein jagah di hai buton ko 'saabir'
tum ne kyuun kaaba ko but-khaana banaa rakkhaa hai