gali ke moD se ghar tak andheraa kyuun hai 'nizaam' — Sheen Kaaf Nizam

vahshat to sang-o-khisht ki tartib le gai
ab fikr ye hai dasht ki vusat bhi le na jaae

nikle kabhi na ghar se magar is ke baavajud
apni tamaam umr safar mein guzar gai

darvaaza koi ghar se nikalne ke liye de
be-khauf koi raasta chalne ke liye de

chubhan ye piiTh mein kaisi hai muD ke dekh to le
kahin koi tujhe pichhe se dekhtaa hogaa

tu akelaa hai band hai kamraa
ab to chehraa utaar kar rakh de

udaasi akele mein Dar jaaegi
ghaDi-do-ghaDi ko khushi bhej de

mere khvaabon ke jharokon ko sajaate rahiye
na sahi vasl magar yaad to aate rahiye

bhuul gai vo shakl bhi aakhir
kab tak yaad koi rahtaa hai

kabhi ziyaada kabhi kam udaas rahtaa huun
tumhaari yaad mein har dam udaas rahtaa huun

ruuh arbaab-e-mohabbat ki laraz jaati hai
tu pashemaan na ho apni jafaa yaad na kar

koi chuTki si kaleje mein liye jaataa hai
ham tiri yaad se ghaafil nahin hone paate

ai sadaf sun tujhe phir yaad dilaa detaa huun
main ne ik chiiz tujhe di thi guhar karne ko