zabaan khaamosh magar nazron mein ujaalaa dekhaa — Tauqeer Ahmad

naadaan meraa dil bahak jaae na kahin
shaanon pe gesuon ko bikheraa na kijiye

is qadar TuuT kar meri nazron mein na dekho varna
tumhaari nazron ko meri nazron ki nazar na lag jaae

maza to ishq kaa tab hai ki ek pal ko sahi
jhuki nazar vo uThaa dein aur main salaam karun

zaraa sambhalun bhi to vo aankhon se pilaa detaa hai
meraa mahbub mujhe hosh mein rahne nahin detaa

aaj ki raat mujhe hosh mein rahne do abhi
aaj ki raat koi aankhon se pilaaegaa mujhe

yuun achaanak na zulfein bikheraa karo
dil to naadaan hai bahak bhi saktaa hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

yaa husn hai naa-vaaqif-e-pindaar-e-mohabbat
yaa ishq hi aasaani-e-atvaar mein gum hai

tu dard bhi duaa bhi tu zakhm bhi davaa bhi
shikve bhi hain tujhi se aur pyaar bhi tujhi se

yaani ki tu qadim jazira hai ishq kaa
aur is mein huun hunut-shuda shaahzaadi main

aql se sirf zehan raushan thaa
ishq ne dil mein raushni ki hai