Ameer Qazalbash

ek khabar hai tere liye
dil par patthar bhari rakh

yaar kya zindagi hai suraj ki
sub.h se shaam tak jala karna

na jaane kaisa masiha tha chahta kya tha
tamam shahr ko bimar dekh kar khush tha

itna bedariyon se kaam na lo
dosto khvab bhi zaruri hai

usi ka shahr vahi mudda.i vahi munsif
hamen yaqin tha hamara qusur niklega

mire junun ka natija zarur niklega
isi siyah samundar se nuur niklega

sukut-e-shab mein dar-e-dil pe ek dastak thi
bikhar gai tiri yaadon ki kahkashaan mujh se

honaa paDaa hai khugar-e-gham bhi khushi ki khair
vo mujh pe mehrbaan hain magar be-rukhi ke saath

apne hamraah khud chalaa karnaa
kaun aaegaa mat rukaa karnaa

muztarib hain maujein kyuun uTh rahe hain tufaan kyuun
kyaa kisi safine ko aarzu-e-saahil hai

giraa diyaa hai to saahil pe intizaar na kar
agar vo Duub gayaa hai to duur niklegaa

main ne kyuun tark-e-taalluq ki jasaarat ki hai
tum agar ghaur karoge to pashimaan hoge