Jamal Abbas Fahmi

koi dast-e-masihaai karam-andaaz hone tak
namak-paashi kaa zakhmon ko maza bhi lag chukaa hogaa

tujh se milne kaa bahaana to koi chaahiye thaa
ham ne vo ek bahaana kabhi DhunDaa hi nahin

koi to aisaa ho jis se main dil ki baat karun
so apne aap se hi baat kartaa rahtaa huun

Thukraa ke chale aae khuddaar tabiat hai
ham un ki inaayat ko khairaat samajhte hain

nahin ye mehndi nahin hai tumhaare haathon par
kisi kaa khun-e-tamannaa lagaae baiThe ho

tazkire hain to faqat qatl ke andaaz ke hain
shahr mein qatl kaa mere koi charchaa hi nahin

meri khud-faraamoshi ab yahaan tak aa pahunchi
puchhtaa huun logon se tum ne mujh ko dekhaa hai

tum apnaa dariyaa yahaan se sameT lo varna
hamaari pyaas ki garmi use jalaa degi

sar ko neza nasib hotaa hai
sarfaraazi yunhi nahin milti

dosti ik din dushman se ho sakti hai
soch ke ye laDne kaa iraada chhoD diyaa

jab khatm hui dil se isaar ki gunjaaish
aangan mein nikal aai divaar ki gunjaaish