Muztar Khairabadi

dil le ke hasinon ne ye dastur nikaalaa

دل لے کے حسینوں نے یہ دستور نکالا دل جس کا لیا اس کو بہت دور نکالا زاہد کو کسی اور کی باتیں نہیں آتیں آیا تو وہی تذکرۂ حور نکالا دشمن کو عیادت کے لیے یار نے بھیجا اچھا یہ علاج دل رنجور نکالا اے تیر ستم چل تری دعوت ہے مرے گھر زخم‌ دل ناشاد نے انکور نکالا وہ تذکرۂ غیر پہ جھنجھلا کے یہ بولے پھر آپ نے مضطرؔ وہی مذکور نکالا

jab kahaa tiir tiri aankh ne aksar maaraa

جب کہا تیر تری آنکھ نے اکثر مارا چتونیں پھیر کے بولے کہ برابر مارا قدر کچھ بھی مرے دل کی بت کافر نے نہ کی زلف پیچاں سے جو الجھا تو مرے سر مارا جان بے موت خدا بھی نہیں لیتا لیکن تو نے بے موت ہی لوگوں کو ستم گر مارا چند ذرے میری مٹی کے فقط ہاتھ آئے دشت غربت کے بگولوں نے جو چکر مارا اک مسلمان کا دل توڑ دیا کیا کہنا اپنے نزدیک بڑا آپ نے کافر مارا مضطرؔ ایسا کوئی اب تک نہ ہوا اور نہ ہو موت نے ہائے عبث داغ سخنور مارا

kaise dil lagtaa haram mein daur-e-paimaana na thaa

کیسے دل لگتا حرم میں دور پیمانہ نہ تھا اس لیے پھر آئے کعبے سے کہ مے خانہ نہ تھا تم نے دیکھی ہی نہیں تقدیر کی تاریکیاں اک اندھیری گور تھی فرقت میں کاشانہ نہ تھا مجمع بیت الحرم کی دھوم سنتے تھے مگر جا کے جب دیکھا تو ان میں کوئی فرزانہ نہ تھا حشر میں اس شوخ کا طرز تغافل دیکھنا مجھ کو پہچانا نہیں حالانکہ بیگانہ نہ تھا حشر میں آخر اسے بھی چھوڑتے ہی بن پڑی خانۂ‌ مدفن بھی گویا اپنا کاشانہ نہ تھا ایسی کیا بیتی کہ مضطرؔ ان بتوں پر مر مٹا جان دے دیتا وہ کچھ ایسا تو دیوانہ نہ تھا

ik naqsh-e-khayaal ru-ba-ru hai

اک نقش خیال رو بہ رو ہے جو کچھ ہے یہ کچھ نہیں ہے تو ہے ہر پھول کے ساتھ ایک کانٹا ہر دوست کے ساتھ اک عدو ہے دل ہے تو ہزار تجھ سے اچھے ایسا ہی تو اک بڑا وہ تو ہے دشمن کے جگر کا خار میں ہوں اور اس کے گلے کا ہار تو ہے دامن جو ہے پردہ‌ دار وحشت اس میں بھی کئی جگہ رفو ہے میں آپ ہی آپ رو رہا ہوں کچھ آپ ہی آپ گفتگو ہے محشر میں کسی کا ہائے کہنا اب آپ کے ہاتھ آبرو ہے او غیر کو آنکھ دینے والے مضطرؔ بھی نگاہ رو بہ رو ہے

teri rangat bahaar se nikli

تیری رنگت بہار سے نکلی پھوٹ کر لالہ زار سے نکلی دل جو دھویا تو تو نظر آیا کیا ہی صورت غبار سے نکلی چھیڑ کر آزما لیا ہم نے تیری آواز تار سے نکلی روح میری ترے تجسس میں جسم نا پائیدار سے نکلی مفت برباد ہے مری حسرت کیوں دل بے قرار سے نکلی بہر تعظیم حشر برپا ہے کس کی میت مزار سے نکلی

jaan ye kah ke but-e-hosh-rubaa ne le li

جان یہ کہہ کے بت ہوش ربا نے لے لی کوئی پوچھے تو یہ کہنا کہ خدا نے لے لی گل مقصود میں اول تو مہک تھی ہی نہیں اور جو تھی بھی وہ حسرت کی ہوا نے لے لی سب سے پہلے تو سیاہی مری قسمت کو ملی جو بچی تھی وہ تری زلف دوتا نے لے لی جان کمبخت محبت میں بچائے نہ بچی بت کافر سے جو چھوٹی تو خدا نے لے لی دم آخر بت بے درد کا دامن چھوٹا میرے ہاتھوں سے بڑی چیز خدا نے لے لی چل بسی جان تو اس بات کا غم کیا مضطرؔ اک امانت تھی خدا کی سو خدا نے لے لی