Sudarshan Faakir

saamne hai jo use log buraa kahte hain
jis ko dekhaa hi nahin us ko khudaa kahte hain

ishq hai ishq ye mazaaq nahin
chand lamhon mein faisla na karo

zikr jab hogaa mohabbat mein tabaahi kaa kahin
yaad ham aaeinge duniyaa ko havaalon ki tarah

teri aankhon mein ham ne kyaa dekhaa
kabhi qaatil kabhi khudaa dekhaa

dekhne vaalo tabassum ko karam mat samjho
unhein to dekhne vaalon pe hansi aati hai

ham se puchho na dosti kaa silaa
dushmanon kaa bhi dil hilaa degaa

ishq mein ghairat-e-jazbaat ne rone na diyaa
varna kyaa baat thi kis baat ne rone na diyaa

mere rukte hi miri saansein bhi ruk jaaeingi
faasle aur baDhaa do ki main zinda huun abhi

aashiqi ho ki bandagi 'faakhir'
be-dili se to ibtidaa na karo

apni surat lagi paraai si
jab kabhi ham ne aaina dekhaa

dil ke divaar-o-dar pe kyaa dekhaa
bas tiraa naam hi likhaa dekhaa

miri zabaan se miri daastaan suno to sahi
yaqin karo na karo mehrbaan suno to sahi