zikr jab hogaa mohabbat mein tabaahi kaa kahin — Sudarshan Faakir

dil to rotaa rahe aur aankh se aansu na bahe
ishq ki aisi rivaayaat ne dil toD diyaa

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

tere jaane mein aur aane mein
ham ne sadiyon kaa faasla dekhaa

ye sikhaayaa hai dosti ne hamein
dost ban kar kabhi vafaa na karo

mere dukh ki koi davaa na karo
mujh ko mujh se abhi judaa na karo

rone vaalon se kaho un kaa bhi ronaa ro lein
jin ko majburi-e-haalaat ne rone na diyaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

kitni bhi pyaari ho har ik shai se ji uktaa jaataa hai
vaqt ke saath to chamkile zevar bhi kaale paD jaate hain

bas ek pyaar ne saalim rakhaa hamein yaaro
raqib mar gae ham mein shigaaf karte hue

gulshan-e-ishq kaa tamaashaa dekh
sar-e-mansur phal hai daar darakht