Tahzeeb Hafi

vo jis ki chhaanv mein pachchis saal guzre hain
vo peD mujh se koi baat kyuun nahin kartaa

sahraa se ho ke baagh mein aayaa huun sair ko
haathon mein phuul hain mire paanv mein ret hai

main jis ke saath kai din guzaar aayaa huun
vo mere saath basar raat kyuun nahin kartaa

teraa chup rahnaa mire zehn mein kyaa baiTh gayaa
itni aavaazein tujhe diin ki galaa baiTh gayaa

apni masti mein bahtaa dariyaa huun
main kinaara bhi huun bhanvar bhi huun

daastaan huun main ik tavil magar
tu jo sun le to mukhtasar bhi huun

main ki kaaghaz ki ek kashti huun
pahli baarish hi aakhiri hai mujhe

tujh ko paane mein masala ye hai
tujh ko khone ke vasvase raheinge

ye ek baat samajhne mein raat ho gai hai
main us se jiit gayaa huun ki maat ho gai hai

bataa ai abr musaavaat kyuun nahin kartaa
hamaare gaanv mein barsaat kyuun nahin kartaa

ik tiraa hijr daaimi hai mujhe
varna har chiiz aarzi hai mujhe

tamaam naakhudaa saahil se duur ho jaaein
samundaron se akele mein baat karni hai