Taskeen Dehlavi

jis vaqt nazar paDti hai us shokh pe 'taskin'
kyaa kahiye ki ji mein mere kyaa kyaa nahin hotaa

kahe deti hain ye nichi nigaahein
ki baalaa-e-zamin kyaa kyaa na hogaa

'taskin' ne naam le ke tiraa vaqt-e-marg aah
kyaa jaane kyaa kahaa thaa kisi ne sunaa nahin

shab-e-visaal mein sunnaa paDaa fasaana-e-ghair
samajhte kaash vo apnaa na raazdaar mujhe

zabt kartaa huun vale is par bhi hai ye josh-e-ashk
gir paDaa jo aankh se qatra vo dariyaa ho gayaa

itni na kiije jaane ki jaldi shab-e-visaal
dekhe hain main ne kaam bigaDte shitaab mein

puchhe jo tujh se koi ki 'taskin' se kyuun milaa
kah diijo haal dekh ke rahm aa gayaa mujhe

qaasid aayaa hai vahaan se tu zaraa tham to sahi
baat to karne de us se dil-e-betaab mujhe

abhi is raah se koi gayaa hai
kahe deti hai shokhi naqsh-e-paa ki

kartaa huun teri zulf se dil kaa mubaadala
har-chand jaantaa huun ye saudaa buraa nahin

taskin' karun kyaa dil-e-muztar kaa ilaaj ab
kam-bakht ko mar kar bhi to aaraam na aayaa