Wazir Agha

aise baDhe ki manzilein raste mein bichh gaiin
aise gae ki phir na kabhi lauTnaa huaa

us ki aavaaz mein the saare khad-o-khaal us ke
vo chahaktaa thaa to hanste the par-o-baal us ke

vo khush-kalaam hai aisaa ki us ke paas hamein
tavil rahnaa bhi lagtaa hai mukhtasar rahnaa

khuli kitaab thi phulon-bhari zamin meri
kitaab meri thi rang-e-kitaab us kaa thaa

itnaa na paas aa ki tujhe DhunDte phirein
itnaa na duur jaa ke hama-vaqt paas ho

yaa abr-e-karam ban ke baras khushk zamin par
yaa pyaas ke sahraa mein mujhe jiinaa sikhaa de

safar tavil sahi haasil-e-safar ye hai
vahaan ko bhuul gae aur yahaan ko pahchaanaa

ajab tarah se guzaari hai zindagi ham ne
jahaan mein rah ke na kaar-e-jahaan ko pahchaanaa

yaa rab tiri rahmat kaa talabgaar hai ye bhi
thoDi si mire shahr ko bhi aab-o-havaa de

ret par chhoD gayaa naqsh hazaaron apne
kisi paagal ki tarah naqsh miTaane vaalaa

aahista baat kar ki havaa tez hai bahut
aisaa na ho ki saaraa nagar bolne lage

dhuup ke saath gayaa saath nibhaane vaalaa
ab kahaan aaegaa vo lauT ke aane vaalaa