Zahoor Minhas

gaaDi mein bhi ghar ko soche jaataa huun
gaaDi aage aur main pichhe jaataa huun

fikr-e-tajdid-e-hijr hai varna
kab mujhe vasl ki zarurat hai

ye to insaaniyat ko Thokar hai
aadmi aadmi kaa naukar hai

vo thak gai thi bhiiD mein chalte hue 'zahur'
us ke badan pe an-ginat aankhon kaa bojh thaa

koi bhi hal nahin udaasi kaa
mujh se kamre ne baarhaa puchhaa

tamaam shahr mein baarish ki dhaak baiTh gai
jo uD rahi thi havaaon mein khaak baiTh gai

bheji tasvir bhi to aankhon ki
yaa'ni aankhein dikhaa rahi ho mujhe

is qadar qahqahe hain duniyaa mein
sharm aati hai mujh ko rote hue

du'aa hai ye raqib bhi miri tarah hi khvaar ho
main chaahtaa huun aap ki raqib se bani rahe

main badaltaa huun roz apnaa hadaf
ye miri mustaqil-mizaaji hai

un ke naqsh-e-qadam pe chalnaa hai
vo jo manzil pe sar ke bal pahunche

dard kaa ehsaas rakkhaa hai faqat insaan mein
haif dimak ji rahi hai 'mir' ke divaan mein