bahaa ke baiThe hain ashkon kaa ik samundar ham — Haidar Jafri

"aisaa dikhaa hai ham ko nazaara kai dafa us ne kiyaa hai ham se kinaara kai dafa har baar mushkilon ne sataayaa mujhe magar maan ne diyaa hai mujh ko sahaaraa kai dafa ek baar maar dete to qissa tamaam thaa par us ne mujh ko hijr mein maaraa kai dafa ik baar bhi palaT ke na dekhaa miri taraf chillaa ke ham ne un ko pukaaraa kai dafa ik baar dekhne se kahaan bhar rahaa hai dil un se kaho ki dekhein dobaara kai dafa aansu firaaq dard-e-jigar be-qaraariyaan un ke liye kiye hain gavaaraa kai dafa 'haidar' ki zindagi ko mayassar sahar nahin hone ko ho rahaa hai saveraa kai dafa"

"jab raston se ishq-e-kaamil hotaa hai tab banda nazdik-e-manzil hotaa hai hamdardi hai dil mein to phir raah dikhaa bas tanqidon se kyaa haasil hotaa hai haq ki baatein us ki samajh mein aati hain jis bande ke siine mein dil hotaa hai rishton se samjhauta karnaa paDtaa hai varna kaun kisi ke qaabil hotaa hai hairat hai vo jis ko ham se rabt nahin dil bhi us ki jaanib maail hotaa hai aaj kahaan insaaf kaa mandir miltaa hai aaj kahaan qaazi hi aadil hotaa hai khud se to namrud nahin bantaa koi asal mein puuraa shahar hi baabul hotaa hai ham ko to hansne ki aadat hai varna muskaanon mein dard bhi shaamil hotaa hai 'haidar' dil mein basne vaalaa hi aksar dil ke armaanon kaa qaatil hotaa hai"

"dil taDaptaa hai miraa har din sahar hone ke baad maut aa jaae na tere bin sahar hone ke baad shaam tak fursat na tujh ko saans lene ki mile aa ke taklifein miri tu gin sahar hone ke baad raat aai aae maikhaane mein kaafir ho gae aur phir se ban gae momin sahar hone ke baad niind to kyaa chiiz aankhein band bhi ham ne na ki jab vo bole aaeinge lekin sahar hone ke baad chain dil ko aankh ko ThanDak khirad ko taazgi neamatein milnaa hai ye mumkin sahar hone ke baad un ke dil mein meri ulfat yuun samaai jis tarah phuul mein khushbu hui saakin sahar hone ke baad raat bhar ashkon ko roke muskuraayaa thaa magar ho gayaa zaahir miraa baatin sahar hone ke baad khauf aataa hai mujhe 'haidar' zamaane se bahut aa ke ban jaa tu miraa zaamin sahar hone ke baad"

"hain bahut mehrbaaniyaan teri yaad hain qadr-daaniyaan teri mere jiine ke do sahaare hain teri yaadein nishaaniyaan teri khud ko paayaa hai panne panne par paDh rahaa thaa kahaaniyaan teri ek din ham ko maar Daaleingi yahi naazuk-bayaaniyaan teri ro paDaa huun main dekh kar phir se apne andar nishaaniyaan teri"

"miraa din khubsurat yuun banaa detaa to kyaa hotaa vo ham ko pyaar se aa kar jagaa detaa to kyaa hotaa bahut vaa'de kiye the aap ne to saath rahne ke mohabbat mein agar ik do nibhaa dete to kyaa hotaa miraa is shab ki taariki se dil bechain hotaa hai rukh-e-anvar se vo parda haTaa dete to kyaa hotaa musavvir huun tasavvur aap ki tasvir hai meraa tumhein gar apni yaadon se miTaa dete to kyaa hotaa main kab se muntazir thaa aap ki nazar-e-karaamat kaa jo lamhe bhar ko hi chehra dikhaa dete to kyaa hotaa 'ajab ye shauq hai galiyon mein teri roz aataa huun tiri raahon mein hi ghar ko banaa dete to kyaa hotaa main apne zakhm khud hi dekh kar khud se ye kahtaa huun vo hans kar Taal jaate hain sazaa dete to kyaa hotaa hai un ki shaa'iri kaa bhi bahut charchaa zabaanon par ghazal ham ko bhi vo 'haidar' sunaa dete to kyaa hotaa"

"likhe the ham ne jo ashkon ki raushnaai se vo ishq ke bhi maqaalaat qimti hain bahut inhi se hoti hai me'raaj ishq ko haasil ye dard aur ye jazbaat qimti hain bahut nisaab-e-'ishq mein puchhe gae hain jo aksar javaab chhoDo savaalaat qimti hain bahut hamaare jiine ki Dhaaras yahi bandhaati hain tumhaari yaadon ki baaraat qimti hain bahut vo jis ke khvaab mein didaar un kaa ho jaae qasam khudaa ki vahi raat qimti hai bahut vo bol de to sabhi kuchh luTaa ke ham rakh dein ye sach hai un ki har ik baat qimti hai bahut hamaare ashk yahaan haisiyat nahin rakhte tumhaare ashkon ki saughaat qimti hai bahut vo lamhe jin mein hamein yaad aap aa jaae vahi hayaat ke lamhaat qimti hain bahut ye jab bhi aate hain ashkon ko saath laate hain ye ashk aur ye barsaat qimti hain bahut"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"