bhaTak na jaae khudaayaa nazar kitaabon mein — Krishn Gopal Maghmum

"koi jalvaa-fishaan hai aur main huun tasavvur kaa jahaan hai aur main huun kaThin hai raah manzil gum shab-e-taar magar azm-e-garaan hai aur main huun khizaan ki anjuman mein huun farokash fareb-e-gulsitaan hai aur main huun ye meraa dil hai yaa tasvir-kHaana jamaal-e-gul-rukhaan hai aur main huun hamaaraa kaarvaan bhaTkaa huaa hai khayaal-e-kaarvaan hai aur main huun nazar mein maavaraa-e-farsh-o-arsh ab fazaa-e-do-jahaan hai aur main huun miraa koi sharik-e-gham nahin hai miraa dard-e-nihaan hai aur main huun ta'assub hai kahin firqa-parasti ajab naazuk samaan hai aur main huun shab-e-taarik ke daaman mein 'maghmum' sukut-e-bekaraan hai aur main huun"

"yuun to hangaame bahut dil mein bapaa rahte hain ham baDe khush hain ki raazi-ba-razaa rahte hain sajti rahti hain hamaare hi liye daar-o-salib koi bhi daur ho ham surkh-qabaa rahte hain zakhm hain siine mein lekin hai tabassum lab par ham ba-taqlid-e-rah-o-rasm-e-vafaa rahte hain apni nazron mein to neamat si hai neamat yaaro honge vo aur jo hasti se khafaa rahte hain hind ki khaak kaa har zarra hai taqdis-maaab zarre zarre ke tale ahl-e-safaa rahte hain ishq ke bandon se kyaa tujh ko gharaz ai duniyaa ham ki hain sab se alag sab se judaa rahte hain roz le aati hai un zulfon ki khushbu ham tak ham tire faiz pe ai baad-e-sabaa rahte hain apni pahchaan hazaaron mein bhi ho jaaegi ek hi vaza pe ham subh-o-masaa rahte hain naghmagi de ke har ik naala-e-gham ko 'maghmum ham hain majbur-e-navaa naghma-saraa rahte hain"

"nahin badle dar-o-divaar-e-zindaan aao divaano jo pahle the vahi hain saaz-o-saamaan aao divaano tum aise sar-phiron ki justuju hai tauq-e-aahan ko bulaati hai tumhein zanjir-e-zindaan aao divaano koi lazzat-shanaas-e-aabla-paai nahin miltaa tarastaa hai har ik khaar-e-bayaabaan aao divaano har ik daagh-e-jigar lau de uThe taariki-e-shab mein karein is rang se jashn-e-charaaghaan aao divaano dilon mein sho'la-e-soz-e-yaqin hai ‘azm-e-mohkam bhi karein taarik zarron ko darakhshaan aao divaano ye maanaa mushkilaat-e-nau-ba-nau ik ik qadam par hain karein mil-jul ke har mushkil ko aasaan aao divaano chalo chal kar sunein 'maghmum' se taaza ghazal us ki vo apni tarz kaa hai ik sukhan-daan aao divaano"

"har qadam teri rahguzar mein hai meri manzil miri nazar mein hai zindagi sarhad-e-khatar mein hai manzil-e-aakhiri nazar mein hai zindagi ham-rikaab ho kab tak aadmi maut ke safar mein hai ishq agar hai miri rag-o-pai mein husn meri nazar nazar mein hai is kaa iqraar khul ke ho ki na ho dil magar hirs-e-maal-o-zar mein hai koi sayyaah hi bataaegaa lutf jo sair mein safar mein hai shadd-o-mad se hai aaj bhi jaari vo tasaadum jo khair-o-shar mein hai ban gayaa hai balaa-e-jaan-e-qaum ek saudaa jo ahl-e-shar mein hai husn jis shai kaa naam hai yaaro dekhne vaale ki nazar mein hai dard-e-sar hai vatan kaa har akhbaar sansani si har ik khabar mein hai rang hi rang hain nigaahon mein haae kyaa baat ham-safar mein hai jazba-e-khair ab kahaan 'maghmum' shar hi shar aaj ke bashar mein hai"

"qadam jo raah-e-mohabbat mein thakne lagtaa hai har ek zarra-e-manzil chamakne lagtaa hai vo jis ne pi ho zaraa si bhi eqtidaar ki mai har ek bazm mein kyaa kyaa bahakne lagtaa hai banaane vaali ho paivand-e-khaak jis ko havaa vo ghuncha vaqt se pahle chaTakne lagtaa hai nigaah-e-shauq mein shaamil jo ho khulus-o-niyaaz naqaab-e-ru-e-darakhshaan sarakne lagtaa hai tumhaari mahki hui zulf ke tasavvur se miraa jahaan-e-takhayyul mahakne lagtaa hai kabhi kabhaar jo hoti hai chaah piine ki nigaah-e-naaz kaa saaghar chhalakne lagtaa hai qarib-e-shaam havaaein jo aah bharti hain kisi ki yaad kaa kaanTaa khaTakne lagtaa hai shab-e-firaaq ki zulmat-farosh vaadi mein vo maahtaab-e-tamanna chamakne lagtaa hai dabaa chukaa huun jise khaak-e-dil mein main yaa-rab vo shoala az-sar-e-nau kyon bhaDakne lagtaa hai rukaa huaa thaa jo aankhon mein jaane kyon 'maghmum vo buund buund lahu phir Tapakne lagtaa hai"

"aa aur har ik lutf-o-inaayat ke liye aa tanhaaiyon mein meri rifaaqat ke liye aa le kar nigah-e-naaz kaa har nashtar-e-sar-tez dil par mire ik taaza jaraahat ke liye aa akhlaaq ke jazbe hi se ho kar kabhi majbur bimaar-e-mohabbat ki ayaadat ke liye aa mahrum hai tujh se miri duniyaa-e-haqiqat tu mere har ik khvaab ki zinat ke liye aa takhil ko miri par-e-parvaaz ataa kar tu mere khayaalaat ki vusat ke liye aa aankhon mein liye meri rihaai ki bashaarat ik umr ke zindaani-e-furqat ke liye aa 'maghmum’ ke qaabu mein nahin phir nigah-o-dil is ki nigah-o-dil ki tahaarat ke liye aa"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"